भोर : माजी मंत्री अनंतराव थोपटे यांच्या निधनाने भोर-वेल्हा तालुक्यांवर शोककळा पसरली आहे. त्यांच्या स्मृतीप्रित्यर्थ मंगळवारी (दि. ९) भोर येथे शोकसभेचे आयोजन करण्यात आले होते. या शोकसभेला भोर आणि राजगड (वेल्हे) तालुक्यातील काँग्रेस, राष्ट्रवादी काँग्रेस, शिवसेना, भाजपा यांसह सर्वपक्षीय नेते, पदाधिकारी, कार्यकर्ते आणि नागरिक हजारोच्या संख्येने उपस्थित होते. सर्वांनी जड अंतःकरणाने अनंतराव थोपटे यांना श्रद्धांजली वाहिली.

या शोकसभेत जिल्ह्यातील आणि तालुक्यातील नेत्यांनी दिवंगत अनंतराव थोपटे यांच्या आठवणींना उजाळा दिला, तसेच त्यांनी आमदार व मंत्री असताना केलेल्या ऐतिहासिक विकासकामांचा गौरव केला.
यावेळी सातारा जिल्हा परिषदेचे माजी उपाध्यक्ष नितीन भरगुडे म्हणाले की, “पश्चिम महाराष्ट्रातील तरुणांना उभे करण्यासाठी थोपटे साहेबांनी नेहमीच मोलाचे सहकार्य केले. साहेब केवळ नेते नव्हते, तर ते ‘लोकनेता’ होते. त्यांनी तन-मन अर्पण करून सर्वसामान्यांना न्याय दिला आणि भोर तालुक्याचा उत्तुंग विकास साधला.

यावेळी माजी आमदार जगन्नाथ शेवाळे, दिलीप यादव, नितीन भरगुडे, चंद्रकांत बाठे, पोपट सुके, उपसभापती विशाल कोंडे, नगराध्यक्ष रामचंद्र आवारे, उपनगराध्यक्ष ॲड. जयश्री शिंदे, रोहन बाठे, ह.भ.प.कृष्णाजी रांजणे, संतोष घोरपडे, भालचंद्र जगताप, विठ्ठल आवाळे, डॉ. इम्रान खान, सुषमा चव्हाण, भाजपा जिल्हा सरचिटणीस सचिन मांडके, पंढरीनाथ भिलारे, गणेश पवार तसेच सर्वपक्षीय नेते, कार्यकर्ते उपस्थित होते.

राजकारण बाजूला ठेवून केवळ समाजकारणाचा ध्यास घेतलेल्या या भाग्यविधात्याने आपल्या ४० वर्षांच्या राजकीय कारकीर्दीत भोर-वेल्ह्याचा कायापालट केला. काँग्रेस पक्षाचे निष्ठावंत म्हणून त्यांची संपूर्ण राज्यात ओळख होती. डोंगरी भागात डोंगराएवढी विकासकामे करून त्यांनी महाराष्ट्राच्या नकाशावर भोर-वेल्ह्याचे नाव सुवर्णअक्षरांनी कोरले. दूरदृष्टी असलेला हा आधारवड कोसळल्याने मावळी जनतेवर दुःखाचा डोंगर पसरला आहे.
– जगन्नाथ शेवाळे,माजी आमदार.

हेही वाचा : Pune District : भोर-वेल्ह्याचा आधारवड हरपला; मान्यवरांकडून अनंतराव थोपटे यांच्या उल्लेखनीय कार्याची आठवण