Tree Cutting – पारगाव ते वाघोली राहू मार्गाच्या सुरू असलेल्या सिमेंटीकरण व रस्ते रुंदीकरण, या गोंडस विकासाच्या नावाखाली वृक्षांची राजरोस कत्तल केली जात आहे. त्यामुळे पर्यावरणप्रेमी आणि स्थानिक नागरिकांकडून संतापाची लाट उसळली आहे. कोट्यवधींचा निधी खर्च होत असताना हिरवाईचा शालू पांघरलेला परिसर उजाड होणार आहे. हा मार्ग पर्यावरण संवर्धनासाठी कुऱ्हाडीचा दांडा, गोतास काळ ठरला आहे.

पारगाव ते वाघोली राहू मार्गावर कामाच्या दर्जाबाबतही नागरिकांकडून शंका- कुशंकांचे वादळ उठले आहे. काही ठिकाणी काळा मुरूम, काळी माती तसेच निकृष्ट दर्जाचे साहित्य वापरले जात असल्याचा आरोप होत आहे. काम सुरू असतानाच काही ठिकाणी रस्त्यावर भेगा व छिद्रे दिसून येत असल्याने भविष्यात टिकाऊपणाबाबतही चिंता व्यक्त होत आहे. रस्त्याच्या कडेला करण्यात येणारा भराव काही ठिकाणी असमतल व चिखलमय असल्याने पावसाळ्यात वाहतुकीला अडथळे निर्माण होण्याची शक्यता आहे.

त्यामुळे संबंधित विभागाच्या अधिकाऱ्यांनी पाहणी करून कामाची गुणवत्ता तपासावी, अशी मागणी नागरिकांकडून होत आहे. दरम्यान, रस्त्याच्या कामासाठी तोडलेल्या झाडांची संख्या किती, त्यासाठी वनविभाग अथवा संबंधित प्राधिकरणाची परवानगी घेण्यात आली होती का, परवानगी असल्यास त्यातील अटींचे पालन केले का आणि तोडलेल्या झाडांच्या बदल्यात वृक्षलागवड करण्यात येणार आहे का, याबाबत प्रशासनाने स्पष्ट माहिती द्यावी, अशी मागणी होत आहे.

कामांचा दर्जा सुमार; प्रवासी संतापले
रस्त्याच्या कामात वापरण्यात येणारे सिमेंट, खडी, मुरूम, लोखंड तसेच इतर साहित्य निर्धारित तांत्रिक निकषांनुसार आहे की नाही, रस्त्याची जाडी व मजबुती योग्य आहे की नाही, याची स्वतंत्र गुणवत्ता तपासणी करण्याची मागणीही नागरिकांनी केली आहे. त्यामुळे पारगाव- वाघोली राहू रोडच्या कामाची तातडीने पाहणी करून रस्त्याचा दर्जा, वापरलेले साहित्य, कामाचा खर्च तसेच झाडे तोडण्यासंबंधीच्या परवानग्यांची चौकशी करावी.