Helicopter Crash: अमेरिकेतील जॉर्जिया राज्यात एका नवविवाहित जोडप्यावर दुर्दैवाचा डोंगर कोसळला आहे. लग्न झाल्यानंतर अवघ्या काही तासांत हेलिकॉप्टर अपघातात भारतीय वंशाच्या वराचा मृत्यू झाला, तर त्याची पत्नी गंभीर धक्क्यातून सावरत आहे. या अपघातात हेलिकॉप्टरच्या वैमानिकाचाही मृत्यू झाला आहे.

मिळालेल्या माहितीनुसार, २६ वर्षीय डेव फिजी आणि २५ वर्षीय जेस्नी रॉबिन्सन यांचा विवाह शुक्रवारी जॉर्जियामधील एका हॉटेलमध्ये मोठ्या उत्साहात पार पडला. या विवाह सोहळ्याला सुमारे ४०० पाहुणे उपस्थित होते. लग्नानंतर नवदांपत्यासाठी खास निरोप समारंभाचा भाग म्हणून हेलिकॉप्टर प्रवासाचे आयोजन करण्यात आले होते.

डेव आणि जेस्नी हे हेलिकॉप्टरने डेकाल्ब-पीचट्री विमानतळाकडे रवाना झाले होते. हेलिकॉप्टरचे नियंत्रण वैमानिक निखिल नरगुंडकर यांच्याकडे होते. मात्र उड्डाण घेतल्यानंतर काही वेळातच हवामान अचानक खराब झाले. परिसरात मुसळधार पाऊस आणि कमी दृश्यमानता असल्याने हेलिकॉप्टरचे (Helicopter)  नियंत्रण सुटल्याचा प्राथमिक अंदाज व्यक्त केला जात आहे.  (Helicopter Crash)

हेलिकॉप्टर जॉर्जियातील डॉसनव्हिल परिसरातील दाट जंगलात कोसळले. या भीषण अपघातात डेव फिजी आणि वैमानिक निखिल नरगुंडकर यांचा जागीच मृत्यू झाला. तर जेस्नी रॉबिन्सन या अपघातातून बचावल्या. सध्या त्यांच्यावर अटलांटा येथील रुग्णालयात उपचार सुरू आहेत.  (Helicopter Crash)

या घटनेनंतर बचाव पथकाने तातडीने शोधमोहीम सुरू केली. मात्र हेलिकॉप्टर दाट जंगलात कोसळल्यामुळे ते शोधण्यात मोठा वेळ लागला. जेस्नी तब्बल सहा तास अपघातग्रस्त हेलिकॉप्टरच्या अवशेषांमध्ये अडकून पडल्या होत्या. अखेर बचाव पथकाने त्यांना सुरक्षित बाहेर काढले.

डेव यांचे वडील जॉर्ज फिजी यांनी माध्यमांशी बोलताना भावनिक प्रतिक्रिया दिली. त्यांनी सांगितले की, अपघातानंतर शुद्धीवर आल्यानंतर जेस्नी यांनी डेव यांना आपल्या मांडीवर पाहिले. त्यावेळी त्यांच्या शरीरातून रक्तस्त्राव झाला होता आणि ते पूर्णपणे थंड पडले होते. जेस्नी या व्यवसायाने परिचारिका असल्यामुळे त्यांना डेव यांचे निधन झाल्याचे लगेच समजले.  (Helicopter Crash)

जेस्नी यांना किरकोळ दुखापती आणि खरचटलेल्या जखमा झाल्या आहेत. सुदैवाने त्यांची कोणतीही हाडे मोडलेली नाहीत. मात्र पतीच्या निधनामुळे त्या मानसिकदृष्ट्या खूप व्यथित असल्याचे कुटुंबीयांनी सांगितले.  (Helicopter Crash)

डेव आणि जेस्नी हे दोघेही भारतीय वंशाचे होते. त्यांच्या कुटुंबाची मूळ मुळे केरळ राज्याशी जोडलेली असल्याची माहिती समोर आली आहे. डेव हे डेल्टा एअरलाईन्समध्ये वैमानिक म्हणून कार्यरत होते.

विशेष म्हणजे, खराब हवामानामुळे या उड्डाणाबाबत डेव यांनी चिंता व्यक्त केली होती, असे त्यांच्या वडिलांनी सांगितले. दृश्यमानता अत्यंत कमी असल्याचे त्यांनी वैमानिकाला सांगितले होते. मात्र अधिक उंचीवरून उड्डाण केल्यास अडचण येणार नाही, असे वैमानिकाने सांगितल्याचे जेस्नी यांनी नंतर कुटुंबीयांना सांगितले.

सध्या या अपघाताचा तपास राष्ट्रीय परिवहन सुरक्षा मंडळाकडून केला जात आहे. हेलिकॉप्टर नेमके कोणत्या कारणामुळे कोसळले, याचा शोध घेतला जात आहे.

आनंदाच्या वातावरणात सुरू झालेला विवाहसोहळा काही तासांतच दुःखद दुर्घटनेत बदलल्याने दोन्ही कुटुंबांवर शोककळा पसरली आहे.