Sanjay Raut: “देशात अनेक प्रश्न असताना, टिपू टिपू किती काळ खेळायचं?” संजय राऊतांचे केंद्र सरकारला आवाहन
Sanjay Raut: 'टिपू सुलतानवरून वाद किती काळ चालणार?'

Sanjay Raut: धाराशिवमध्ये भाजपाचे नगरसेवक विलास लोंढे हे टिपू सुलतान जयंतीच्या कार्यक्रमाला उपस्थित होते. या कार्यक्रमाचा व्हिडीओ व्हायरल झाल्यानंतर राजकीय वर्तुळात चर्चांना उधाण आलं आहे. यावर ठाकरे गटाचे नेते संजय राऊत यांनी प्रतिक्रिया दिली आहे. टिपू सुलतान वीर होता की भारताचा शत्रू होता ही भूमिका केंद्राने स्पष्ट केली पाहिजे, असे संजय राऊत यांनी म्हंटले आहे.
“टिपू सुलतान इंग्रजांविरोधातल्या लढाईत मारला गेला. त्यामुळे फार मोठा वर्ग इथे आहे जो टिपू सुलतानला हिरो मानतो. यामध्ये हिंदू-मुसलमान करायचं असेल तर त्यासाठी कुणी अडवलेलं नाही. पण एकदा काय ती भूमिका घेतली पाहिजे. टिपू सुलतानबाबत सरकारची अधिकृत भूमिका काय आहे ते सरकारने जाहीर केलं पाहिजे,” असं खासदार संजय राऊत यांनी म्हटलं आहे.
“टिपू सुलतानच्या मदतीसाठी महाराष्ट्रातलं सैन्यही गेलं होतं. ब्रिटिशांविरोधात ते लढले होते. राज्यात त्या काळात जे काही सरदार होते ते टिपूच्या मदतीसाठी ब्रिटिशांच्या विरोधात लढत होते. बहुदा ते सांगलीचे पटवर्धन सरदार होते, ते नंतर पाहता येईल. पण टिपू सुलतानवरून वाद किती काळ चालणार?,” असा सवालही राऊत यांनी केला.
‘टिपू टिपू किती काळ खेळायचं?’
टिपू सुलतान इंग्रजांविरोधात लढताना मरण पावलेला वीर आहे की या राष्ट्राचा शत्रू आहे? याबाबत केंद्र सरकारने भूमिका स्पष्ट केली पाहिजे. सरकार जाहीर करत नाही तोपर्यंत हा वाद कायम राहिल आणि हा वाद या सध्याच्या सरकारला हवा आहे. या देशात आणि राज्यात अनेक प्रश्न आहेत. टिपू टिपू किती काळ खेळायचं? मला वाटतं हा विषय थांबवला पाहिजे असं संजय राऊत यांनी म्हटलं आहे.
हेही वाचा:





