TomTom Traffic Index 2025 – शहराचा विकास ज्या झपाट्याने होतोय, त्याच झपाट्याने शहरातील वाहतूक कोंडीही वाढली आहे. परिणामी पुणेकरांना वाहतुकीने त्रस्त केले आहे. मुंबईपेक्षा पुण्यामध्ये वाहतूक कोंडी अधिक असून, वाहतूक कोंडीत जगात चौथ्या क्रमांकावर असणारे पुणे २०२५ मध्ये आता पाचव्या क्रमांकावर पोहोचले आहे. त्यावरून पुण्यातील वाहतूक कोंडी किंचित कमी झाल्याचे दिसून येते.

बंगळुरू, मुंबई, पुणे यांसह जगामध्ये वाहतूक कोंडी ही मोठी डोकेदुखी ठरली आहे. त्यामुळे मानसिक त्रास आणि वेळेचे नियोजन कोलमडत आहे. जगभरातील प्रत्येक मोठ्या शहरात वाहनांच्या वाढत्या संख्येमुळे कमी अंतर कापण्यासाठी बराचवेळ जात असल्याचे चित्र आहे. त्यामध्ये टॉम-टॉम या संस्थेने ‘ट्रॅफिक इंडेक्स २०२५’ नावाने एक अहवाल तयार केला आहे.

त्यासाठी टॉमटॉमने जगभरातील प्रत्यक्ष वाहनांच्या वेग मोजण्यासाठी जीपीएस डेटावर आधारित कोंडीचे विश्लेषण करून हा अहवाल तयार केला आहे. त्यामध्ये देशात सर्वाधिक वाहतूक कोंडीमध्ये पहिल्या दहामध्ये बंगळुरू आणि पुणे या दोन शहरांचा समावेश असल्याचे दिसून आले. तर, जगातील ४९२ शहरांमधील पहिल्या ५० मध्ये हैदराबाद, मुंबई, चेन्नई, जयपूर, कोलकता, नवी दिल्ली, पुणे, बंगळुरू यांचा समावेश असल्याचे दिसून आले आहे.

शहरातील वाहतूक कोंडीत पुणे शहर २०२२ मध्ये सातव्या तर २०२३ मध्ये सहाव्या स्थानावर होते. मात्र, २०२४ मध्ये पुणे थेट चौथ्या स्थानावर पोहचले. त्यामुळे पुणेकरांचा कोंडीत बराचवेळ जात असल्याने वेळेचे नियोजनही कोलमडत होते. २०२५ मध्ये पुण्यातील वाहतूक कोंडीत किंचित सुधारणा झाल्यामुळे चौथ्या स्थानावरून पाचव्या स्थानावर आले आहे.

पुण्यात पंधरा मिनिटांमध्ये साडेचार किलोमीटर अंतर पार होत असून, वर्षभरात १५२ तास पुणेकरांचा वाहतूक कोंडीत गेला आहे. जगात सर्वाधिक वाहतूक कोंडी असलेल्या शहरांमध्ये बंगळुरू पहिल्यांदाच दुसऱ्या स्थानावर पोहोचले आहे. गेल्या वर्षी बंगळुरू हे तिसऱ्या क्रमांकावर होते. तर मुंबई हे १८ स्थानावर गेले आहे. जगात मेक्सिको सिटी हे सर्वाधिक वाहतूक कोंडी असलेले शहर ठरले आहे.