Toby Albert Smashes Six Sixes In Six Balls Hampshire vs Sussex One Day Cup : इंग्लंडच्या देशांतर्गत ‘वन-डे कप’ (One-Day Cup) स्पर्धेत हॅम्पशर (Hampshire) संघाने ससेक्सविरुद्ध धावांचा प्रचंड डोंगर उभारत ५१ धावांनी ऐतिहासिक विजय नोंदवला आहे. होवच्या मैदानावर खेळल्या गेलेल्या या हाय-स्कोरिंग सामन्यात हॅम्पशरने प्रथम फलंदाजी करताना ५० षटकांत ९ बाद ३८३ धावांचा विशाल स्कोर उभा केला. हा या हंगामातील सर्वोच्च स्कोर तर हॅम्पशरच्या लिस्ट-ए (List-A) इतिहासातील दुसरा सर्वात मोठा स्कोर ठरला. मात्र, या सामन्यात खरी खळबळच उडाली ती टोबी एल्बर्टच्या (Toby Albert) सलग ६ चेंडूंतील ६ षटकारांच्या अद्भूत पराक्रमामुळे!

दोन वेगवेगळ्या षटकांत सलग ६ षटकार!

हॅम्पशरच्या डावात सलामीवीर बेन मेज (१०९ धावा) आणि अली ओर (१०५ धावा) यांनी पहिल्या विकेटसाठी २२५ धावांची शतकीय भागीदारी केली. ही भक्कम सुरुवात मिळाल्यानंतर मैदानात आलेल्या टोबी एल्बर्टने षटकारांचा पाऊस पाडला. एल्बर्टने सलग ६ चेंडूंवर ६ षटकार ठोकण्याचा पराक्रम केला. त्याचे हे ६ षटकार दोन वेगवेगळ्या ओव्हरमध्ये आले.

Toby Albert is the 11th man to hit six consecutive sixes in a professional match 🤯

Here’s how he did it… 🧨 pic.twitter.com/UcFHT081xh

— Hampshire Cricket (@hantscricket) August 10, 2026

त्याने प्रथम नान्तेस ओस्थुइजेनच्या ओव्हरच्या शेवटच्या दोन चेंडूंवर दोन सिक्स मारले आणि त्यानंतरच्या ओव्हरमध्ये ओली कर्टलीच्या शेवटच्या चार चेंडूंवर सलग चार सिक्स ठोकले. एल्बर्टने अवघ्या ३७ चेंडूंत ५ चौकार आणि ८ षटकारांसह ८६ धावांची वादळी खेळी साकारली.

हेही वाचा – Brevis No Look Six : डेव्हाल्ड ब्रेव्हिसचा अद्भूत ‘नो-लुक’ सिक्स! ९७ मीटर लांब षटकार ठोकून चेंडूकडे बघितलही नाही, VIDEO व्हायरल

चार्ली टियरचे शतकी झुंज ठरली अपयशी –

प्रत्युत्तरात ३८४ धावांच्या विशाल आव्हानाचा पाठलाग करताना ससेक्सची सुरुवात खराब झाली. मात्र, चार्ली टियरने ९४ चेंडूंत १११ धावांची शतकीय खेळी करत खिंड लढवली. त्याला जॅक लीनिंग (९२ धावा) आणि दान इब्राहिम (५५ धावा) यांनी चांगली साथ दिली. परंतु, हॅम्पशरच्या एडी जैकने ५८ धावांत ४ विकेट्स घेत ससेक्सचा डाव ३३२ धावांवर गुंडाळला. एडी जैकने फलंदाजीतही अवघ्या ५ चेंडूंत २० धावा कुटल्या होत्या. ससेक्सच्या फलंदाजांनी कडवी झुंज दिली तरीही ३८३ धावांचे लक्ष्य त्यांच्यासाठी खूप मोठे ठरले.