Bomb Threat : मुंबईत सुरू असलेल्या अर्थसंकल्पीय अधिवेशनादरम्यान गुरुवारी महाराष्ट्र विधानभवन आणि शहरातील इतर प्रमुख ठिकाणी अज्ञात व्यक्तीकडून ईमेलद्वारे बॉम्बने उडवण्याची धमकी मिळाली आहे. विधिमंडळाच्या अधिकृत ईमेल अकाउंटवर सकाळी ६.५७ वाजता प्राप्त झालेल्या ईमेलमध्ये विधानभवन संकुल, बॉम्बे स्टॉक एक्सचेंज, बॉम्बे हायकोर्ट, मुंबई मेट्रो आणि एका बँकेवर संभाव्य हल्ल्यांची धमकी देण्यात आली, असे विधान परिषदेचे अध्यक्ष राम शिंदे यांनी सांगितले. तपासणीनंतर विधिमंडळ संकुलात काहीही संशयास्पद आढळले नाही आणि प्राथमिक चौकशीत ही धमकी बनावट असल्याचे दिसून आले. बॉम्ब शोधक आणि निकामी पथकाने (बीडीडीएस) त्यानंतर परिसर सुरक्षित घोषित केला. सुरक्षा संस्थांनी तपास सुरू केला आहे आणि परिस्थितीचे बारकाईने निरीक्षण केले आहे. ईमेल मिळाल्यानंतर बॉम्ब शोधक आणि निकामी पथकाने ताबडतोब विधिमंडळ संकुलात सखोल शोध मोहीम सुरू केली. धमकीचा ईमेल मिळाल्यानंतर, सुरक्षा प्रोटोकॉल तातडीने सुरू करण्यात आले आणि कर्मचाऱ्यांना आणि इतर लोकांना इमारतीतून सुरक्षितपणे बाहेर काढण्यात आले, असे शिंदे यांनी सांगितले. यामुळे विधिमंडळ संकुलातील आणि आजूबाजूची सुरक्षा वाढवण्यात आली आहे. दरम्यान, ठाकरेसेना आमदार मिलिंद नार्वेकर यांनी विधिमंडळाचे कामकाज दिवसभरासाठी तहकूब करण्याची आणि संपूर्ण इमारतीची कसून तपासणी करण्याची मागणी केली. विधान परिषदेत हा मुद्दा उपस्थित करताना ठाकरेसेना नेते अनिल परब म्हणाले की, सरकारने किमान यावर निवेदन द्यावे आणि परिस्थितीची सभागृहाला माहिती द्यावी. एकही मंत्री यावरती विधान करत नाही. सरकार हे प्रकरण गांभीर्याने घेत नाही, असा दावा परब यांनी केला. तसेच, तपास झाल्याशिवाय अधिवेशन चालवू नका. फक्त भिती दाखवण्यासाठी धमकी दिली की, या मागे काही आहे हे तपासले पाहिजे. एकीकडे फारूक अब्दूल्ला यांना मारण्याचा कट होतोय तर दुसरीकडे महाराष्ट्रात बॉम्बची धमकी दिली आहे. त्यामुळे या प्रकरणाचा संपूर्ण तपास केला पाहिजे, असे राष्ट्रवादीचे(शप) आमदार रोहित पवार म्हणाले.
