Pravin Tarde : मराठी चित्रपटसृष्टीत आपल्या दमदार अभिनयाने, लेखनाने आणि दिग्दर्शनाने वेगळी ओळख निर्माण करणारे प्रवीण तरडे त्यांच्या चित्रपटांइतकेच स्पष्टवक्तेपणामुळेही चर्चेत असतात. मनात असेल ते थेट बोलायचं, कोणाचीही भीडभाड न बाळगता आपली भूमिका मांडायची आणि स्वतःच्या मातीशी असलेलं नातं जपायचं, ही त्यांची खास शैली आहे.

मात्र, त्यांच्या याच रोखठोक बोलण्याचा अनेकदा वेगळा अर्थ काढला जातो. कधी त्यांना माजोरडा म्हटलं जातं, तर कधी त्यांच्या बोलण्याच्या पद्धतीवरून त्यांना ट्रोल केलं जातं. आता या टीकेवर प्रवीण तरडे यांनी मौन न बाळगता आपल्या खास शैलीत उत्तर दिलं आहे. ‘मी काय माज केला बाबा तुझा? काय तुझे दोन रुपये चोरले का?’ असा थेट सवाल करत त्यांनी आपल्या स्वभावामागची पार्श्वभूमी स्पष्ट केली आहे.

नेमकं काय म्हणाले प्रवीण तरडे?

प्रवीण तरडे यांनी ‘राजश्री मराठी’ला दिलेल्या मुलाखतीत आपल्या स्वभावाविषयी आणि त्यांच्यावर होणाऱ्या टीकेविषयी मनमोकळेपणाने भाष्य केलं. आपल्या बोलण्याच्या पद्धतीमुळे अनेकदा गैरसमज होत असल्याचं सांगताना ते म्हणाले, “तो तरडे, तो लय शहाणा आहे, लय माजोरडा आहे, असं म्हणतात.

मी काय माज केला बाबा तुझा? काय तुझे दोन रुपये चोरले का? माज केला म्हणजे काय केलं? ते म्हणतात, त्याची बोलण्याची पद्धत बघा. मग मी कसा बोलू? मी आलोय मुळशी तालुक्यातून.”

आपली बोलण्याची शैली ही आपण ज्या सामाजिक आणि भौगोलिक वातावरणात वाढलो, त्यातून घडल्याचं त्यांनी स्पष्ट केलं. प्रत्येक व्यक्तीची बोलण्याची पद्धत वेगळी असते आणि त्यामागे तिची जडणघडण, परिसर आणि अनुभव कारणीभूत असतात, असं त्यांचं म्हणणं आहे.

‘लोकांना आवडावं म्हणून मी स्वतःला बदलणार नाही!’

आपल्या बोलण्याच्या शैलीचं समर्थन करताना प्रवीण तरडे यांनी सुबोध भावे, नागराज मंजुळे आणि स्वप्नील जोशी यांचाही उल्लेख केला. प्रत्येकाची बोलण्याची एक विशिष्ट पद्धत असते आणि त्यामागे त्यांची सामाजिक व भौगोलिक पार्श्वभूमी असते, असं त्यांनी सांगितलं.

ग्रामीण भागात वाढल्यामुळे मोठ्या आवाजात बोलण्याची सवय कशी लागली, याविषयीही त्यांनी भाष्य केलं. पूर्वी ग्रामीण भागातून आलेल्या लोकांना आपली गोष्ट इतरांना पटवून देण्यासाठी पोटतिडकीने बोलावं लागत असे. हीच सवय आपल्या व्यक्तिमत्त्वाचा भाग बनल्याचं त्यांनी सांगितलं.

“आता लोकं ऐकू लागली म्हणून मी अचानक माझं बोलणं बदललं, तर जास्त ट्रोल होईन. त्यापेक्षा मी आहे तसाच बोलणार. वागणं-बोलणं बदललं तर माणूस विचित्र होतो. तो खोटा होतो,” असं प्रवीण तरडे म्हणाले.

“माझं बोलणं, माझी स्टाइल ही माझ्या सामाजिक, भौगोलिक वातावरणातून आलेली आहे. वाचनाने मी समृद्ध झालोय, बदललेलो नाहीये. अभ्यास तुम्हाला शांत करू शकतो; पण तुमचा मूळ स्वभाव बदलू शकत नाही,” असं ते म्हणाले.

“तुम्ही आम्हाला माऊली म्हणून नमस्कार केला, तर आम्हीसुद्धा तुम्हाला माऊली म्हणून नमस्कार करू, पण आपल्या देवा-धर्माविषयी कोणी आक्षेपार्ह बोललं, तर आपण गप्प बसणार नसल्याचंही त्यांनी स्पष्ट केलं. “तुम्ही माझ्या देवा-धर्मावर बोललात, तर मी आक्रमक होणारच. मी असा कलाकार नाहीये, जो मूग गिळून गप्प बसेल,” असं प्रवीण तरडे यांनी ठामपणे सांगितलं.