शिक्षक-पदवीधर निवडणुकीच्या पाच जागांसाठी आज मतदान;
१८२ उमेदवारांचे भवितव्य मतपेटीत बंद होणार!

Top 15 News:  महाराष्ट्र विधान परिषदेच्या तीन पदवीधर आणि दोन शिक्षक मतदारसंघांसाठी आज मतदान होत आहे. सकाळी ८ ते सायंकाळी ४ या वेळेत मतदान प्रक्रिया पार पडेल. पाच जागांसाठी १८२ उमेदवार रिंगणात असून, २ हजार ४१९ मतदान केंद्रांची व्यवस्था करण्यात आली आहे. एकूण १० लाख ६८ हजार ७२ मतदार मतदानाचा हक्क बजावणार आहेत. महायुतीतील बंडखोरी आणि महाविकास आघाडीतील मैत्रीपूर्ण लढतीमुळे निवडणुकीत चुरस वाढली आहे. पुणे, नागपूर, छत्रपती संभाजीनगर, अमरावती या विभागांतील लढतींकडे लक्ष लागले आहे.

‘दुष्काळात बिनविरोध, सुकाळात काय?’;
सदाभाऊ खोतांचा नेत्यांना सवाल

सांगली जिल्हा मध्यवर्ती सहकारी बँकेच्या निवडणुकीत जवळपास १५ जागा बिनविरोध होण्याची शक्यता आहे. यावरून आमदार सदाभाऊ खोत यांनी नेत्यांवर निशाणा साधला. भ्रष्टाचाराचे आरोप आणि विकासाच्या मुद्द्यांवर संघर्ष करणारे नेते संचालकपदाच्या वाटणीवेळी एकत्र येतात, मग हा संघर्ष जनतेसाठी की खुर्चीसाठी, असा सवाल त्यांनी केला. दुष्काळाच्या नावाखाली बिनविरोध निवडणुकीची भूमिका घेतली जात असेल, तर सुकाळात जागा बिनविरोध कशा झाल्या, असा प्रश्नही खोत यांनी उपस्थित केला. आमदार गोपीचंद पडळकर यांचा संघर्ष हा केवळ एका पदासाठी नसून शेतकरी आणि वंचितांच्या प्रतिनिधित्वासाठी असल्याचेही त्यांनी म्हटले.

जरांगेंच्या ऑडिओ क्लिपवरून राजकारण तापलं;
शिंदेंच्या शिवसेनेची SIT चौकशीची मागणी

मनोज जरांगे यांनी पत्रकार परिषदेत कथित ऑडिओ क्लिप ऐकवल्यानंतर शिंदेंच्या शिवसेनेच्या नेत्यांनी मुख्यमंत्री देवेंद्र फडणवीस यांची भेट घेतली. या प्रकरणाची सखोल चौकशी करण्याची मागणी त्यांनी निवेदनाद्वारे केली. कथित क्लिपमधील संभाषणाची फॉरेन्सिक आणि सायबर तपासणी करून संबंधितांची भूमिका स्पष्ट करावी, अशी मागणी राहुल शेवाळे यांनी केली. तसेच, या प्रकरणात कटकारस्थान आहे का आणि सामाजिक सलोखा बिघडवण्याचा प्रयत्न झाला आहे का, याचीही चौकशी व्हावी, असे नेत्यांनी म्हटले. मुख्यमंत्री फडणवीस यांनी एसआयटी स्थापन करण्याचे आश्वासन दिल्याचे शिवसेना नेत्यांनी सांगितले.

विद्यार्थ्यांसाठी महत्त्वाची बातमी!
दिवाळीनंतर आता उन्हाळ्याची ४३ दिवसांची सुट्टी जाहीर

महाराष्ट्रातील शाळांच्या २०२६-२७ या शैक्षणिक वर्षातील दिवाळी आणि उन्हाळी सुट्ट्यांचे वेळापत्रक जाहीर करण्यात आले आहे. शिक्षण विभागाच्या परिपत्रकानुसार, दिवाळीची सुट्टी २ ते १४ नोव्हेंबर २०२६ या कालावधीत असेल. त्यानंतर १६ नोव्हेंबरपासून शाळा नियमित सुरू होतील. तसेच, उन्हाळी सुट्टी ३ मे ते १४ जून २०२७ या काळात असणार आहे. या सुट्ट्यांचे नियोजन करताना शाळांनी शिक्षण विभागाच्या सूचनांचे पालन करणे आवश्यक आहे. स्थानिक कारणांमुळे सुट्ट्यांच्या तारखांमध्ये बदल करायचा असल्यास विभागाची पूर्वपरवानगी घ्यावी लागणार आहे.

पुण्यात प्रदूषण कायम!
४१८ कोटींचा निधी मंजूर, तरीही हवेची गुणवत्ता सुधारली नाही Top 15 News:  

पुण्यातील हवा प्रदूषण कमी करण्यासाठी केंद्र सरकारने सात वर्षांत महापालिकेला ४१८.४५ कोटी रुपयांचा निधी मंजूर केला. त्यापैकी २७५.२८ कोटी रुपये खर्च करण्यात आले आहेत. मात्र, एवढा निधी खर्च होऊनही शहरातील हवा प्रदूषणाची समस्या कायम आहे. राष्ट्रीय हवा गुणवत्ता मानकांची पूर्तता न करणाऱ्या शहरांमध्ये पुण्याचा समावेश असल्याने चिंता व्यक्त होत आहे. प्रदूषणाच्या मूळ स्रोतांवर लक्ष केंद्रित करून सर्वसमावेशक उपाययोजना राबविण्याची गरज तज्ज्ञांनी व्यक्त केली आहे.

 ‘जरांगेंच्या ऑडिओ क्लिपची SIT चौकशी करा’;
गुलाबराव पाटील यांचा इशारा

मनोज जरांगे पाटील यांनी सादर केलेल्या कथित ऑडिओ क्लिपची फॉरेन्सिक लॅब आणि एसआयटीमार्फत सखोल चौकशी करावी, अशी मागणी मंत्री गुलाबराव पाटील यांनी केली आहे. खासदार श्रीकांत शिंदे आणि उपमुख्यमंत्री एकनाथ शिंदे यांना बदनाम करण्याचा प्रयत्न आहे का, तसेच शिवसेना-भाजपमध्ये वाद निर्माण करण्याचा डाव आहे का, याचा तपास करण्याची मागणी त्यांनी केली. ऑडिओ क्लिपमधील आवाजाची तपासणी करून सत्य समोर आणावे आणि दोषींवर कारवाई करावी, असेही ते म्हणाले. या प्रकरणी मुख्यमंत्री देवेंद्र फडणवीस यांची भेट घेणार असल्याचे सांगत, बिनबुडाचे आरोप सहन करणार नाही, असा इशाराही त्यांनी दिला.

  ‘हर्षवर्धन सकपाळ यांच्या अकलेचे दिवाळे निघाले का?’;
ज्योती वाघमारेंचा हल्लाबोल

मनोज जरांगे पाटील यांनी सादर केलेल्या कथित ऑडिओ क्लिपवरून राजकीय आरोप-प्रत्यारोप सुरूच आहेत. काँग्रेस प्रदेशाध्यक्ष हर्षवर्धन सकपाळ यांनी एकनाथ शिंदे आणि श्रीकांत शिंदे यांच्या ईडी चौकशीची मागणी केल्याच्या पार्श्वभूमीवर शिवसेना प्रवक्त्या खासदार ज्योती वाघमारे यांनी त्यांच्यावर टीका केली. केवळ कथित ऑडिओ क्लिपच्या आधारे चौकशी आणि अटकेची मागणी करणे चुकीचे असल्याचे त्या म्हणाल्या. प्रसिद्धी मिळवण्यासाठी आरोप केले जात असल्याचा दावाही वाघमारे यांनी केला. दरम्यान, ऑडिओ क्लिपमधील दाव्यांची सत्यता तपासूनच पुढील कारवाई व्हावी, अशी मागणी शिवसेनेकडून करण्यात येत आहे.

  ‘न्याय द्या, अन्यथा महाराष्ट्रभर रान पेटवेन’;
जयनाथ पूर्णेकरांचा इशारा

हत्या प्रकरणातील पीडित कुटुंबाला न्याय मिळावा, अशी मागणी करत जयनाथ पूर्णेकर यांनी उपमुख्यमंत्री एकनाथ शिंदे यांना हस्तक्षेप करण्याचे आवाहन केले आहे. या प्रकरणातील दोषींवर कठोर कारवाई करावी, अशी मागणी त्यांनी केली. राजेंद्र शिंदे आणि मीनाक्षी शिंदे यांच्यावर अद्याप कारवाई का झाली नाही, असा सवालही त्यांनी उपस्थित केला. आरोपींना पुणे जिल्ह्यातील मुळशी येथे बंदूक चालवण्याचे प्रशिक्षण दिल्याचा आरोप करत या दाव्याची चौकशी करण्याची मागणी त्यांनी केली. पोलीस आयुक्त शैलेंद्र साळवी यांच्यावर विश्वास व्यक्त करत, न्याय न मिळाल्यास महाराष्ट्रभर आंदोलन उभारण्याचा इशाराही पूर्णेकर यांनी दिला.

 ‘पक्षासाठी ११० सभा घेतल्या, हकालपट्टीने परतफेड’;
नितेश कराळे मास्तर भावूक
।
नागपूर पदवीधर मतदारसंघाचे अपक्ष उमेदवार नितेश कराळे मास्तर यांची राष्ट्रवादी काँग्रेसमधून हकालपट्टी झाल्याची माहिती समोर आल्यानंतर त्यांनी नाराजी व्यक्त केली. पक्षाच्या कारवाईची माहिती माध्यमांतून मिळाल्याचे सांगत, विधानसभा आणि लोकसभा निवडणुकीत पक्षासाठी ११० सभा घेतल्याची आठवण त्यांनी करून दिली. शरद पवार यांच्याबद्दल आदर व्यक्त करत त्यांनी पक्षाचा निर्णय स्वीकारला; मात्र कारवाई चुकीची असल्याचे म्हटले. काँग्रेसच्या दबावाची शक्यता त्यांनी व्यक्त केली, पण ठोस माहिती नसल्याचे स्पष्ट केले. आता मतदारच मतदानातून उत्तर देतील आणि मोठ्या मताधिक्याने विजयी करतील, असा विश्वास त्यांनी व्यक्त केला.

  नंदुरबारमध्ये पाणीटंचाईचे संकट? ;
प्रशासनाला आधीच उपाययोजनांचे निर्देश

नंदुरबार जिल्ह्यात आगामी काळात संभाव्य पाणीटंचाईच्या पार्श्वभूमीवर आमदार डॉ. विजयकुमार गावित यांच्या अध्यक्षतेखाली आढावा बैठक घेण्यात आली. जिल्हाधिकारी कार्यालयातील नियोजन भवन येथे झालेल्या बैठकीत टंचाईग्रस्त होण्याची शक्यता असलेल्या गावांमधील पाणीपुरवठ्याचा आढावा घेण्यात आला. पाणीटंचाई गंभीर होण्यापूर्वीच आवश्यक उपाययोजना करण्याचे निर्देश गावित यांनी अधिकाऱ्यांना दिले. बैठकीला माजी खासदार डॉ. हिना गावित, डॉ. सुप्रिया गावित, निवासी उपजिल्हाधिकारी आशा संघवी यांच्यासह विविध विभागांचे अधिकारी, सरपंच आणि ग्रामसेवक उपस्थित होते.

ड्रायव्हिंग लायसन्ससाठी आता ७५ टक्के गुणांची अट? ;
केंद्राचा नवा प्रस्ताव चर्चेत Top 15 News:  

नवीन ड्रायव्हिंग लायसन्स मिळवण्याच्या नियमांत बदल करण्याचा प्रस्ताव केंद्र सरकारने मांडला आहे. प्रस्तावानुसार, वाहन चालविण्याच्या परीक्षेत उत्तीर्ण होण्यासाठी ७५ टक्के गुण मिळवणे आणि किमान ३० मिनिटांचे सुरक्षित वाहन चालविण्याचे प्रशिक्षण घेणे आवश्यक असेल. तसेच, लायसन्सवरील नाव आणि पत्ता आधार पडताळणीद्वारे ऑनलाइन बदलण्यासाठी शुल्कमाफीचा प्रस्ताव आहे. नवीन किंवा नूतनीकरण केलेल्या लायसन्ससाठी वॉटरप्रूफ पीव्हीसी कार्ड देण्याचीही तरतूद आहे. मसुद्यावर नागरिक आणि तज्ज्ञांकडून ३० दिवसांत सूचना व हरकती मागवण्यात आल्या असून, अभिप्रायानंतरच अंतिम नियम निश्चित केले जातील.

देशातील १३ राज्यांना मुसळधार पावसाचा इशारा;
महाराष्ट्रात उष्ण आणि दमट हवामानाची शक्यता

देशातील अनेक भागांत हवामानात बदल होत असून, भारतीय हवामान विभागाने काही राज्यांना पावसाचा इशारा दिला आहे. ४ नोव्हेंबरपर्यंत काही भागांत पावसाची शक्यता असून, दक्षिण भारतात २३ ते २८ ऑक्टोबरदरम्यान पावसाचा जोर वाढू शकतो. तमिळनाडू, केरळ आणि आंध्र प्रदेशासह काही भागांत मुसळधार पावसाचा अंदाज आहे. पावसादरम्यान ताशी ४० ते ७० किलोमीटर वेगाने वारे वाहण्याची, तसेच विजांच्या कडकडाटाची शक्यता वर्तवण्यात आली आहे. दरम्यान, महाराष्ट्रातील कोकणात काही ठिकाणी पावसानंतर आज मुंबईसह अनेक भागांत उष्ण आणि दमट हवामान राहण्याची शक्यता आहे.

AI चा नोकऱ्यांना फटका?
बार्कलेज बँकेत ५ हजार कर्मचाऱ्यांची कपात?

कृत्रिम बुद्धिमत्तेच्या वाढत्या वापरामुळे रोजगाराबाबत चिंता व्यक्त होत असताना, ब्रिटिश बार्कलेज बँकेत मोठ्या कर्मचारी कपातीची योजना समोर आली आहे. वृत्तानुसार, बँक यावर्षी सुमारे ५ हजार कर्मचाऱ्यांची पदे कमी करण्याच्या तयारीत असून, त्यापैकी जवळपास एक हजार पदे आधीच रद्द करण्यात आली आहेत. उर्वरित कपात २०२६ अखेरपर्यंत होण्याची शक्यता आहे. खर्च कमी करून नफा सुधारण्याचा बँकेचा उद्देश आहे. दरम्यान, अ‍ॅमेझॉनमधील कर्मचारी कपातीचे वृत्तही चर्चेत आहे. मात्र, बार्कलेजमधील कपातीमागे एआय हेच प्रमुख कारण असल्याचे स्पष्ट झालेले नाही

हॅरी ब्रूकचे विक्रमी द्विशतक;
शुबमन गिलचा मोडला वर्ल्ड रेकॉर्ड

इंग्लंडचा कर्णधार हॅरी ब्रूकने आंतरराष्ट्रीय एकदिवसीय क्रिकेटमध्ये नवा इतिहास रचला आहे. श्रीलंकेविरुद्ध खेळताना ब्रूकने अवघ्या ११४ चेंडूंत द्विशतक ठोकत भारताच्या शुबमन गिलचा (११७ चेंडू) सर्वात जलद द्विशतकाचा जागतिक विक्रम मोडला. एकदिवसीय सामन्यात द्विशतक झळकावणारा तो इंग्लंडचा पहिलाच फलंदाज ठरला आहे. ब्रूकने ११६ चेंडूंत २१ चौकार आणि १० षटकारांसह २०२ धावांची वादळी खेळी केली. त्याच्या या ऐतिहासिक खेळीच्या बळावर इंग्लंडने ४० षटकांत ४ बाद ४२९ धावांचा विशाल डोंगर उभारला. यापूर्वी हा विक्रम बेन स्टोक्सच्या (१८२ धावा) नावावर होता.

मनोरंजन विश्वावर शोककळा!
अभिनेते टॉम स्केरिट यांचे निधन Top 15 News:  

हॉलिवूडमधून दुःखद बातमी समोर आली आहे. ‘टॉप गन’, ‘एलियन’ आणि ‘पिकेट फेन्सेस’ यांसारख्या गाजलेल्या चित्रपट व मालिकांमधून प्रेक्षकांच्या मनावर छाप पाडणारे ज्येष्ठ अभिनेते टॉम स्केरिट यांचे २१ ऑक्टोबर रोजी वयाच्या ९३व्या वर्षी निधन झाले. त्यांच्या कुटुंबीयांनी ही माहिती दिली. ‘पिकेट फेन्सेस’ मालिकेतील भूमिकेसाठी त्यांना १९९३ मध्ये एमी पुरस्कार मिळाला होता. ‘M*A*S*H’ या चित्रपटातून त्यांना विशेष ओळख मिळाली. सहा दशकांहून अधिक काळ अभिनय क्षेत्रात योगदान देणाऱ्या या दिग्गज कलाकाराच्या निधनाने हॉलिवूडमध्ये शोक व्यक्त केला जात आहे.