Mallikarjun Kharge – बिहारसह काही राज्यांची सत्ता मतचोरीच्या माध्यमातून मिळवण्यात आल्याचा आरोप कॉंग्रेसचे अध्यक्ष मल्लिकार्जुन खर्गे यांनी केला. मात्र, तो आरोप बिहारचे माजी मुख्यमंत्री नितीश कुमार यांच्या पक्षाने (जेडीयू) फेटाळला.

बिहारमधील विधानसभा निवडणूक प्रक्रिया प्रामाणिकपणे, पारदर्शकतेने संपन्न झाली. जनतेने दिलेल्या कौलावर प्रश्‍नचिन्ह उपस्थित करण्याचा कुठलाही अधिकार कॉंग्रेसला नाही. बिहारमध्ये कॉंग्रेसला केवळ ६ जागा जिंकता आल्या.

राजकीयदृष्ट्या पुन्हा कधीच सावरू न शकणाऱ्या स्थितीत जनतेने त्या पक्षाला ढकलले, अशी प्रतिक्रिया जेडीयूचे प्रवक्ते राजीव रंजन प्रसाद यांनी दिली. खर्गे यांनी पंतप्रधान नरेंद्र मोदी यांच्याविषयी केलेली एक टिप्पणी मोठे राजकीय वादंग उभे करणारी ठरली.

मोदी का बाप भी जाएगा, असे खर्गे म्हणाले. त्या टिप्पणीचा तीव्र निषेध प्रसाद यांनी केला. कॉंग्रेसच्या वर्तणुकीत मोठा बदल होण्याची कुठलीही शक्यता नाही, असे त्यांनी म्हटले. बिहारमध्ये भाजप, जेडीयू आणि इतर पक्षांचा समावेश असणाऱ्या एनडीएची सत्ता आहे.

त्या राज्यात २०२५ यावर्षीच्या अखेरीस विधानसभा निवडणूक झाली. त्यामध्ये प्रचंड यश मिळवून एनडीएने सत्ता राखली. तर, राजद, कॉंग्रेसचा समावेश असणाऱ्या विरोधकांच्या महाआघाडीचा धुव्वा उडाला.