पुणेः शहरातील जीबीएस रुग्णांची संख्येचा आलेख दिवसागणिक वाढत चालला असून या आजाराने पुणेकरांचे टेन्शन वाढवले आहे. काल जीबीएसची रुग्णसंख्या १११ असताना त्यात १७ रुग्णांची वाढ झाली असून आता राज्यातील जीबीएसची एकूण रुग्णसंख्या १२७ व जाऊन पोहचली आहे. मात्र, ससून रुग्णालयात या आजारावर उपचार घेणाऱ्या एका ५४ वर्षीय संशयित महिलाचा मृत्यू झाला आहे.

आतापर्यंत या आजराच्या संशयित दोन रुग्णांचा मृत्यू झाला आहे. पुण्यात २० रुग्ण व्हेंटिलेटरवर आहेत. तर पुण्याच्या सिंहगड परिसरात या आजाराचे रुग्ण सर्वाधिक म्हणजेच ८० टक्के रुग्ण असल्याचे सांगितले जात आहे. महापालिकेच्या वतीने सर्वेक्षणावर भर देण्यात आला असून वाढत्या रुग्ण संख्येचे कारण शोधले जात आहे.

सिंहगड परिसरात महापालिकेच्या आरोग्य विभागाच्या पथकांनी केलेल्या सर्वेक्षणात अतिसार, उलट्या अशी लक्षणे असलेल्या रुग्णांच्या माहितीचे संकलन केले जात आहे. या सर्वेक्षणात एकूण १४४ रुग्ण आढळून आले आहेत. ज्यांना वरील लक्षणे आहेत. या सर्वेक्षणासाठी आरोग्य विभागाला सहकार्य करून या आजाराच्या कारणांचा शोध घेण्यासाठी कालच पुण्यात केंद्रीय पथक दाखल झाले आहे.

फेरसर्वेक्षण करण्याच्या सूचना 

या पथकाने ज्या भागात रुग्णसंख्या अधिक आढळून आली येत आहे. त्या ठिकाणी जात पाहणी केली आहे. तसेच त्यानंतर आरोग्य विभागाच्या पथकांची बैठक पार पडली. या बैठकीत महापालिकेच्या आरोग्य विभागाच्या पथकांना फेरसर्वेक्षण करण्याच्या सूचना करण्यात आल्या आहेत.

आता येथून पुढचे सर्वेक्षण करण्यासाठी कशा पद्धतीने माहितीचे संकलन करणे अपेक्षित आहे. कशा पद्धतीने सर्वेक्षणाची माहिती गोळा करावी, या विषयी चर्चा करण्यात आली. त्यानंतर तातडीने महापालिकेच्या आरोग्य विभागाला फेरसर्वेक्षण करण्याच्या सूचना देण्यात आल्या आहेत. या पथकांकडून दिवस अखेरीस सर्वेक्षणाचे अहवाल उच्चस्तरीय पथकाने मागवले आहेत. यात रुग्णांची लक्षणे आणि नेमकी बाधा कशामुळे आदी गोष्टींची माहिती घेण्यात येत आहे.