The Great Khali WWE Loyalty : ‘ऑल एलिट रेसलिंग’ (एईडब्ल्यू) कडून अनेक बड्या सुपरस्टार्सना आपल्याकडे ओढण्याचे प्रयत्न सुरू असतानाच, भारताचा दिग्गज रेसलर द ग्रेट खलीने या स्पर्धेत उतरण्यास स्पष्ट नकार दिला आहे. ‘फॉर द लव्ह ऑफ रेसलिंग २०२६’ या कार्यक्रमात बोलताना खलीने आपली निष्ठा केवळ आणि केवळ डब्ल्यूडब्ल्यूई (World Wrestling Entertainment) सोबत असल्याचे जाहीर केले आहे. “ज्याने स्टार बनवले, त्याची साथ सोडणार नाही” – खली ऑल एलिट रेसलिंगमध्ये काम करण्याबाबत विचारलेल्या प्रश्नाला उत्तर देताना खली म्हणाला, “तुम्हा सर्वांना माझ्याबद्दल माहितच आहे. मला जर भविष्यात पुन्हा कधी काम करण्याची संधी मिळाली, तर मी फक्त वर्ल्ड रेसलिंग एंटरटेनमेंटसाठीच काम करेन. या कंपनीने मला ओळख दिली, मला स्टार बनवले. त्यामुळे मी इतर कोणत्याही कंपनीत जाण्याचा विचारही करू शकत नाही. जर काम असेल, तर ते फक्त डब्ल्यूडब्ल्यूईमध्येच असेल.” डब्ल्यूडब्ल्यूईमधील ऐतिहासिक कारकीर्द – खलीने २००६ मध्ये डब्ल्यूडब्ल्यूईमध्ये पदार्पण केले होते. आपल्या पहिल्याच सामन्यात त्याने दिग्गज ‘द अंडरटेकर’ला आव्हान देऊन रेसलिंग विश्वात खळबळ उडवून दिली होती. जॉन सीना, रे मिस्टेरियो यांसारख्या मोठ्या सुपरस्टार्ससोबतच्या त्याच्या लढती आजही चाहत्यांच्या लक्षात आहेत. ७ फूट १ इंच उंची आणि अफाट ताकदीमुळे खली अल्पावधीतच जागतिक स्टार बनला. हेही वाचा – BCCI Blunder : बीसीसीआयची मोठी चूक अन् रोहितचे चाहते संतापले! चॅम्पियन्स ट्रॉफीचं श्रेय चक्क गिलला? ‘त्या’ ग्राफिकमुळे पेटला मोठा वाद २०२१ मध्ये ‘हॉल ऑफ फेम’ने सन्मानित – खलीच्या कारकिर्दीतील सुवर्णक्षण २००७ मध्ये आला, जेव्हा त्याने ‘वर्ल्ड हेवीवेट चॅम्पियनशिप’ जिंकली. २०१४ नंतर तो रिंगमध्ये फारसे सक्रिय नसला, तरी त्याच्या कामगिरीची दखल घेत २०२१ मध्ये डब्ल्यूडब्ल्यूईने त्याला मानाच्या ‘हॉल ऑफ फेम’मध्ये समाविष्ट केले. आज अनेक रेसलर्स अधिक पैशांसाठी इतर कंपन्यांकडे वळत असताना खलीने दाखवलेली ही निष्ठा चाहत्यांची मनं जिंकत आहे.
