Asian Games 2026 Wrestling Aman Sehrawat Wins Gold 57kg Category : आशियाई क्रीडा स्पर्धा २०२६ (Asian Games 2026) च्या १४ व्या दिवशी भारताचा युवा ऑलिम्पिकवीर अमन सेहरावतने (Aman Sehrawat) कुस्तीच्या आखाड्यात ऐतिहासिक कामगिरी करत सुवर्णपदकाला (Gold Medal) गवसणी घातली आहे. पुरुषांच्या ५७ किलो फ्रीस्टाइल प्रकाराच्या अत्यंत चुरशीच्या आणि रोमहर्षक अंतिम लढतीत अमनने उत्तर कोरियाचा विद्यमान विश्वविजेता पैलवान हान चोंग-सोंग याचा ११-७ अशा फरकाने धुव्वा उडवला. हांगझोऊ आशियाडमधील कांस्यपदकाचे रूपांतर नागोयात थेट सुवर्णात करत अमनने पुन्हा एकदा स्वतःची जागतिक ताकद सिद्ध केली आहे.

अखेरच्या मिनिटात फिरवला सामना; ११-७ ने चॅम्पियनला लोळवले!

अंतिम लढतीच्या सुरुवातीपासूनच दोन्ही मल्लांमध्ये जोरदार चुरस पाहायला मिळाली. अमनने चपळाई दाखवत सुरुवातीलाच ६-१ अशी भक्कम आघाडी घेतली होती. मात्र, दुखापतीच्या ब्रेकनंतर उत्तर कोरियाच्या खेळाडूने अनपेक्षित मुसंडी मारत सलग डाव टाकून आघाडी खेचून घेतली. सामना संपायला अवघा एक मिनिट शिल्लक असताना अमनने कमालीचे मानसिक संतुलन राखले. त्याने चोंग-सोंगला मॅटवर घट्ट लॉक करून चितपट करत लागोपाठ गुण मिळवले आणि सामना ११-७ ने खिशात घालत सुवर्ण वेध साधला.

फ्रीस्टाइल कुस्तीत भारताचे दुसरे सुवर्ण; पदकांची लयलूट कायम!

Heartiest congratulations to our Olympic bronze medallist Aman Sehrawat on winning the Gold Medal in the Men’s Freestyle 57kg category at the Aichi-Nagoya #AsianGames2026

After defeating North Korea’s Chong Song Han in the final, Aman has brilliantly upgraded his Asian Hangzhou… pic.twitter.com/II8ac7NEjd

— Anurag Thakur (@ianuragthakur) October 3, 2026

चालू आशियाई क्रीडा स्पर्धेत सुजीत कलकलच्या सुवर्ण विजयानंतर फ्रीस्टाइल प्रकारातील भारताचे हे दुसरे सुवर्णपदक, तर कुस्तीतील एकंदर चौथे पदक ठरले आहे. पॅरिस ऑलिम्पिक २०२४ मध्ये कांस्यपदक पटकावणाऱ्या अमनने आशियाई मंचावरही आपल्या सातत्याचा दबदबा कायम राखत देशाला अभिमानास्पद क्षण मिळवून दिला.

हेही वाचा – Rohit Sharma Record : रोहित शर्माने मोडला सचिन तेंडुलकरचा २२ वर्षांचा वर्ल्ड रेकॉर्ड! ‘हा’ पराक्रम करणारा जगातील पहिलाच खेळाडू

अनाथपणाचे दुःख पचवून छत्रसाल ते ऑलिम्पिक पोडियमपर्यंतचा प्रवास!

Heartiest congratulations to Aman Sehrawat on clinching Gold 🥇 in the Men’s 57kg Freestyle Wrestling at the #AsianGames2026. 🤼

From a Bronze at Hangzhou to Olympic Bronze in Paris and now the continental crown, his rise is a testament to relentless effort and ambition. May his… pic.twitter.com/vEglKxxcxj

— Nitin Gadkari (@nitin_gadkari) October 3, 2026

१६ जुलै २००३ रोजी हरियाणातील झज्जर जिल्ह्यातील बिरोहड गावात जन्मलेल्या अमनचा हा प्रवास अंगावर काटा आणणारा आहे. वयाच्या अवघ्या ११ व्या वर्षी आई-वडिलांचे छत्र हरपल्यानंतर अमन आणि त्याच्या बहिणीला काकांनी सावरले. आईच्या निधनानंतर नैराश्याचा सामना करणाऱ्या अमनने आपले सर्व लक्ष कुस्तीवर केंद्रित केले. दिल्लीच्या छत्रसाल स्टेडियमध्ये प्रशिक्षक ललित कुमार यांच्या मार्गदर्शनाखाली घाम गाळणाऱ्या अमनने आज परिस्थितीवर मात करत तिरंगा डौलाने फडकवला.