पिरंगुट : पिरंगुट-भूगाव जिल्हा परिषद गटावर दोन्ही राष्ट्रवादी काँग्रेस गटांचे वर्चस्व पाहायला मिळाले. जिल्हा परिषद गटातून राष्ट्रवादी काँग्रेसचे ज्येष्ठ नेते शांताराम बाजीराव इंगवले हे विजयी झाले असून ते सलग दुसर्यांदा जिल्हा परिषद सदस्य म्हणून निवडून गेले आहेत. तर पंचायत समितीअंतर्गत पिरंगुट व भूगाव गणातून राष्ट्रवादी काँग्रेस शरदचंद्र पवार पक्षाचे राहुल दामोदर पवळे व दगडू नामदेव करंजावणे हे विजयी झाले आहेत. मात्र जिल्हा परिषद गटात शरदचंद्र पवार पक्षाचा गड आला पण सिंह गेला अशी स्थिती निर्माण झाली आहे. नागरिकांच्या मागास प्रवर्गासाठी राखीव असलेल्या पिरंगुट-भूगाव जिल्हा परिषद गटात पंचरंगी लढत झाली. राष्ट्रवादी काँग्रेसकडून शांताराम इंगवले, शरदचंद्र पवार पक्षाकडून महादेव कोंढरे, भाजपकडून भानुदास पानसरे, शिवसेनेकडून भाऊ मरगळे तर उद्धव बाळासाहेब ठाकरे पक्षाकडून आबासाहेब शेळके हे उमेदवार रिंगणात होते. या गटात एकूण 32 हजार 821 मतदारांनी मतदानाचा हक्क बजावला. मतमोजणीनंतर राष्ट्रवादी काँग्रेसचे शांताराम इंगवले हे 1384 मतांनी विजयी झाले. त्यांना 11,141 मते मिळाली. शरदचंद्र पवार पक्षाचे महादेव कोंढरे यांना 9,757, उद्धव बाळासाहेब ठाकरे पक्षाचे आबासाहेब शेळके यांना9,233, भाजपचे भानुदास पानसरे यांना 1,937 तर शिवसेनेचे भाऊ मरगळे यांना 498 मते मिळाली. दरम्यान, संपूर्ण तालुक्याचे लक्ष लागून असलेल्या पिरंगुट पंचायत समिती गणात अटीतटीची लढत झाली. सर्वसाधारण जागेसाठी सहा उमेदवार रिंगणात होते. येथे 13,283 मतदारांनी मतदान केले. या गणातून राष्ट्रवादी काँग्रेस शरदचंद्र पवार पक्षाचे राहुल पवळे हे 363 मतांनी विजयी झाले. त्यांना 3,741 मते मिळाली. उद्धव बाळासाहेब ठाकरे पक्षाचे रामदास गोळे यांना 3,378, राष्ट्रवादी काँग्रेसचे रमेश पवळे यांना 2,637, भाजपचे महेश वाघ यांना 2,630, शिवसेनेचे शैलेश पांढरे यांना 636 तर मनसेचे सौरभ निकटे यांना 147 मते मिळाली. सर्वसाधारण असलेल्या भूगाव गणात राष्ट्रवादी काँग्रेस शरदचंद्र पवार पक्षाचे दगडू नामदेव करंजावणे हे 438 मतांनी विजयी झाले. येथे 19,539 मतदारांनी मतदान केले. करंजावणे यांना 6,732 मते, उद्धव बाळासाहेब ठाकरे पक्षाचे अनिल पवार यांना 6,294, राष्ट्रवादीचे राजेंद्र दबडे यांना 4,244, भाजपचे नामदेव चौधरी यांना 1,301, शिवसेनेच्या सुनीता उभे यांना 527 तर वंचित बहुजन आघाडीचे सुभाष कांबळे यांना 238 मते मिळाली. विजय-पराजय पिरंगुटकरांचाच पिरंगुट पंचायत समिती गणात सहा उमेदवारांपैकी पाच उमेदवार पिरंगुट गावातीलच असल्याने येथे विजय व पराजय दोन्ही पिरंगुटकरांचाच ठरणार हे स्पष्ट होते. अखेर राहुल पवळे यांनी बाजी मारत विजयश्री खेचून आणली, तर उर्वरित चार पिरंगुटकरांना पराभव स्वीकारावा लागला. त्यामुळे विजयही पिरंगुटकरांचा आणि पराजयही पिरंगुटकरांचाच अशी चर्चा मतदारांत रंगली.
