माळीनगर : संसार, मोह आणि मायेचा त्याग करून आनंदरुपी जीवनाच्या शोधात तसेच ना लेकरांची चिंता, ना प्रपंचाची भ्रांत अशा अवस्थेत टाळ, मृदुंगाच्या तालावर भक्तिरसात तल्लीन झालेल्या श्री जगदगुरू संत तुकाराम महाराजांच्या पालखी सोहळ्याचे माळशिरस तालुक्याच्या पूर्व भागातील श्री गहिनीनाथ महाराज व श्री शंकर महाराज यांच्या माळीनगर या पावनभूमीत स्वागत केले. यावेळी श्री जगदगुरू संत तुकाराम महाराज यांच्या पालखी सोहळ्यातील पहिले मानाचे उभे रिंगण माळीनगर येथे मंगळवार (दि.२१) रोजी सकाळी मुख्य पालखी महामार्गावर उत्साही, आनंदमय वातावरणात पार पडले.

यावेळी अकलूज येथील रात्रीच्या मुक्कामानंतर भागवत धर्माची पताका खांद्यावर घेऊन विठुरायाच्या भेटीला निघालेल्या वारकरी भक्तांचे व पालखी सोहळ्याचे दि सासवड माळी शुगर फॅक्टरी व माळीनगर ग्रामपंचायतींच्या वतीने स्वागत केले. माळीनगर येथे तुकोबांचा पालखी सोहळा आल्यावर माळीनगर साखर कारखान्याचे चेअरमन मोहन लांडे, सरपंच अनुपमा एकतपुरे, आदींनी पालखी सोहळ्याचे स्वागत केले. सकाळी ८.४५ वाजता संत तुकाराम महाराज पालखी सोहळा स्टार रेसीडेन्सी समोरील पालखी मार्गाच्या नवीन रस्त्यावर हरिनामाच्या जयघोषात उभ्या रिंगणाच्या ठिकाणी दाखल झाला. रिंगणाचा हा नेत्रदीपक सोहळा पाहण्यासाठी लाखो भाविकांनी गर्दी केली होती.

पालखी सोहळा मैदानावर आल्यानंतर सेवेकरी यांनी पालखी रथातून खांद्यावर घेत ओपन थिएटरमध्ये आणून ठेवली. तेथे पालखीच्या पादुकांची मंत्राच्या जयघोषात विधीवत पूजा व आरती कारखान्याचे मॅनेजिंग डायरेक्टर गणेश इनामके व त्यांच्या पत्नी भारतीताई गणेश इनामके, रोहन वालिया व रोहिणी वालीया (इनामके) या उभयतांच्या हस्ते करण्यात आली. टाळकरी, विणेकरी, पताकावाले, पखवाजवाले, तुळशी वृदांवन डोईवर घेतलेल्या महिला आणि बाभुळगावकरांचा व डॉ. धवलसिंह मोहिते-पाटील यांच्या मानाच्या अश्वांनी हरिनामाच्या गजरात परिक्रमा पूर्ण करीत रिंगण पूर्ण केले. हा सोहळ्याने लाखो नयनांचे पारणे फेडणारा ठरला.

अश्‍वांच्या टापाखालील माती कपाळी

ज्ञानोबा… तुकाराम… ज्ञानराज माऊली… तुकाराम जयघोषाने माळीनगर परीसर दुमदुमून गेला होता. रिंगण सोहळा संपताच अश्वांच्या टापाखालील माती कपाळी लावण्यासाठी घ्यायला भाविकांनी मोठी गर्दी केली होती. उभे रिंगण संपल्यानंतर मॉडेल हायस्कूलच्या प्रांगणात असलेल्या ओपन थिएटरमध्ये विसावा घेण्यासाठी पालखी सोहळा मार्गस्थ झाला. दुपारी बाराच्या सुमारास पालखीने बोरगाव येथील नवीन पालखी तळावरच्या मुक्कामासाठी प्रस्थान ठेवले.