पुणे, {प्रभात वृत्तसेवा} – गणेशखिंड रोडवर सध्या मेट्रोचे काम सुरू आहे. यामुळे वीर चाफेकर चौक (म्हसोबा गेट) येथून सिमला ऑफिसकडे जाणारा रस्ता बंद करण्यात आला होता. हा रस्ता तातडीने सुरू करण्यात यावा, अशी मागणी भाजपचे पर्यावरण आघाडी प्रमुख संदीप काळे यांनी वाहतूक पोलीस उपायुक्तांकडे पत्राद्वारे केली आहे.

काही महिन्यांपूर्वी पुणे विद्यापीठकडून उड्डाणपुलावरून येणारा रस्ता खुला करण्यात आला आहे. परंतु, उड्डाणपुलाखालून सिमला ऑफिस चौकाकडे जाणारा रस्ता अद्याप बंद असल्याने छत्रपती शिवाजीनगर मधील मॉडेल कॉलनी, वडारवाडी, गोखलेनगर, जनवाडी भागातील नागरिकांना सिमला ऑफिस चौकाकडे जाताना नरवीर तानाजीवाडीकडे जाऊन सुमारे एक कि.मी.चा फेरा मारावा लागत आहे.

तसेच, नरवीर तानाजीवाडीकडे जाणारा रस्ता एकेरी वाहतूक आहे ती दुहेरी करण्यात यावी, अशी मगाणीही काळे यांनी केली असून याबाबत तातडीने निर्णय झाला नाही तर तीव्र आंदोलनाचा इशाराही निवेदनात देण्यात आला आहे.