Raj and Uddhav Thackeray :  मुख्य निवडणूक आयुक्त ज्ञानेश कुमार यांच्या राजीनाम्याच्या मागणीने जोर धरला आहे. याचदरम्यान, आता निवडणूक आयोगाच्या कारभाराविरोधात मनसे आणि उद्धवसेना यांचा संयुक्त मोर्चा येत्या ४ ऑक्टोबरला मुंबईत निघणार आहे. या मोर्चाच्या पार्श्वभूमीवर आज (29 सप्टेंबर) ठाकरे बंधूंची संयुक्त पत्रकार परिषद पार पडली. या पत्रकार परिषदेत राज ठाकरे यांनी मोर्चाचा संपूर्ण प्लान सांगितला आहे.

राज ठाकरे म्हणाले की, “४ ऑक्टोबरला भायखळा ते मुंबई महापालिकेपर्यंत हा मोर्चा काढण्यात येणार आहे. मुंबई महापालिकेसमोर या मोर्चाची सांगता सभेत रूपांतर होईल. सकाळी १० वाजता मोर्चाची वेळ आहे. ११.३० वाजल्यापासून मोर्चाला सुरुवात होईल.

हा निवडणूक आयोगाच्या विरोधातला मोर्चा आहे. गेली अनेक वर्ष या विषयावर मी बोलतोय. २०१७-१८ या काळात ईव्हीएम आणि या विषयावर मी अनेक नेत्यांना भेटलो होतो. ४ तारखेला यावर सविस्तर बोलणार आहे ,” असं त्यांनी सांगितले.

मोर्चात प्रत्येकाच्या हातात तिरंगा

या मोर्चात कुठल्याही राजकीय पक्षाचा झेंडा नसेल. प्रत्येकाच्या हातात तिरंगा असेल. देशातील लोकशाही आणि संविधानाचा हा मुद्दा आहे. त्यामुळे सर्वांच्या हातात तिरंगाच असेल असं सांगत मनसे अध्यक्ष राज ठाकरे यांनी संयुक्त मोर्चाबाबत पत्रकार परिषदेत माहिती दिली.

पुढे राज ठाकरे म्हणाले, “या मोर्चानंतर त्याची पुढील रूपरेषा आम्ही ठरवू. आम्ही सर्वच राजकीय पक्षांना आमंत्रण देणार आहे. सत्ताधारी पक्षातील लोकांना व्यासपीठावर यायचं असेल तर ते देखील येऊ शकतात. निवडणूक आयोगाचा गेल्या काही वर्षातला जो कारभार आहे त्या विरोधात हा मोर्चा आहे.”

‘खाई त्याला खवखवे’; भाजपला टोला 

तर दुसरीकडे, ‘विरोधी पक्षाला त्यांच्या पराभवाचे खापर निवडणूक आयोगावर सोडायचे आहे’, असा आरोप भाजपकडून केला जात आहे. याबाबत पत्रकारांनी विचारले असता, राज ठाकरे यांनी ‘खाई त्याला खवखवे आम्ही निवडणूक आयोगावर बोलतोय, त्याचा भाजपाला त्रास का होतोय?’ असा टोला भाजपाला लगावला.

हेही वाचा: 

Neeru Dhanda Gold Medal: नीरू धांडाने आशियाई क्रीडा स्पर्धेतील विक्रम मोडला ; ऐतिहासिक सुवर्णपदक जिंकले