लोणंद – फलटण तालुक्यातील तांबवे धरण परिसरात गौण खनिजाच्या चोरीवर कारवाई करण्यासाठी गेलेल्या महसूल विभागाच्या भरारी पथकावर थेट जेसीबी चालवून हल्ला करण्यात आल्याची धक्कादायक घटना उघडकीस आली आहे.

शासकीय वाहनाचे नुकसान करुन संशयितांनी घटनास्थळावरुन पलायन केले. या प्रकारामुळे गौण खनिज माफियांची वाढती मुजोरी पुन्हा एकदा स्पष्ट झाली आहे. महसूल विभागाच्या भरारी पथकाने सोमवारी (दि. २०) रात्री तांबवे धरण परिसरात छापा टाकला असता धरणातील माती जेसीबीच्या साहाय्याने बिगर क्रमांकाच्या टिपरमध्ये भरुन चोरी सुरु असल्याचे आढळले.

कारवाईची चाहूल लागताच जेसीबी चालकाने शासकीय स्कॉर्पिओवरच जेसीबीची (एमएच १० एस ७८१८) फरांडी आदळून वाहनाचे नुकसान केले. त्यानंतर संशयित पळून जाण्याच्या प्रयत्नात जेसीबी पलटी झाली. मात्र, बिगर क्रमांकाचा टिपर घेऊन दुसरा चालक पसार झाला.  (Revenue Department)

याप्रकरणी तानाजी शेळके (रा. निंबोडी, ता. खंडाळा) तसेच जेसीबी व टिपरवरील अज्ञात चालकांविरुद्ध लोणंद पोलीस ठाण्यात गुन्हा दाखल करण्यात आला आहे. या घटनेने गौण खनिज चोरट्यांचे धाडस किती वाढले आहे, याची प्रचिती आली आहे.

शासकीय अधिकाऱ्यांवरच हल्ला करून कारवाई हाणून पाडण्याचा प्रयत्न करणाऱ्या अशा माफियांना कोणाचे संरक्षण आहे का, असा सवाल आता उपस्थित होत आहे. महसूल आणि पोलीस प्रशासनाने या टोळीचा तातडीने पर्दाफाश करून कठोर कारवाई करावी, अशी मागणी नागरिकांतून होत आहे. पोलीस उपनिरीक्षक व्ही. एस. जगताप तपास करत आहेत.

हेही वाचा: 

Pune Crime News : सराईत अल्पवयीन तरूणावर जीवघेणा हल्ला; १० ते १२ जणांकडून वार