राजगुरुनगर : संभाव्य दुष्काळी परिस्थितीवर मात करण्यासाठी आणि भविष्यातील जलसंकटाची तीव्रता कमी करण्याच्या उद्देशाने खेड तालुक्यातील आखरवाडी केंद्रातील प्राथमिक शिक्षकांनी श्रमदानातून पापळवाडी-बहिरवाडी ओढ्यावर वनराई बंधारे बांधले. पावसाळ्यात वाहून जाणारे पाणी अडवून भूजल पातळी वाढविण्यासाठी शिक्षकांनी घेतलेल्या या पुढाकाराचे जिल्हाभरातून कौतुक होत आहे.

महाराष्ट्रातील संभाव्य दुष्काळी परिस्थिती लक्षात घेऊन पुणे जिल्हा परिषदेचे मुख्य कार्यकारी अधिकारी गजानन पाटील यांच्या नेतृत्वाखाली जिल्ह्यातील विविध गावे, वाड्या-वस्त्यांमधून वाहणार्‍या ओढ्या-नाल्यांतील पाणी अडविण्यासाठी वनराई बंधारे बांधण्याचे आवाहन करण्यात आले आहे. या आवाहनाला प्रतिसाद देत आखरवाडी केंद्रातील शिक्षकांनी पापळवाडी व बहिरवाडी परिसरातील ओढ्यावर श्रमदानातून वनराई बंधारे उभारून पाणी अडविण्याचा प्रयत्न केला.

खेड पंचायत समितीचे गटविकास अधिकारी विशाल शिंदे आणि गटशिक्षणाधिकारी अमोल जंगले यांच्या मार्गदर्शनाखाली, आखरवाडी केंद्रप्रमुख विजय शिंदे यांच्या पुढाकारातून हा उपक्रम राबविण्यात आला. पावसाळ्यात वाहून जाणारे पाणी अडवून त्याचा उपयोग भूजल पातळी वाढविण्यासाठी व्हावा, या उद्देशाने शिक्षकांनी एकत्र येत श्रमदान केले. या वनराई बंधार्‍यांमुळे पापळवाडी व चास गावांच्या पाणीपुरवठ्यासाठी वापरल्या जाणार्‍या सार्वजनिक विहिरीच्या पाणीपातळीत वाढ होण्यास मदत होण्याची अपेक्षा आहे. तसेच परिसरातील भूजल पातळी सुधारण्यास हातभार लागणार असून, जनावरे, पक्षी आणि अन्य वन्यजीवांसाठी पाण्याची उपलब्धता वाढण्यासही मदत होऊ शकते.

या उपक्रमात ग्रामपंचायत पापळवाडीच्या ग्रामसेविका शारदा पवार, जिल्हा परिषद पापळवाडी शाळेचे मुख्याध्यापक प्रवीण कोरडे, संतोष भोसले यांच्यासह आखरवाडी केंद्रातील शिक्षक अरुण तळपे, किसन गिरंगे, रवींद्र पाचारणे, विलास निसरड, मधुकर गिलबिले, संदीप जाधव, विठ्ठल काळे, कैलास मुळूक, मनोहर मुळूक, हेमंत कारोटे, अमोल सांडभोर, मारुती भोमाळे, रविकिरण वाघमारे आणि बाळासाहेब मुंडे यांनी सहभाग घेतला.

शिक्षकांच्या सामाजिक बांधिलकीचे कौतुक

शिक्षकांची भूमिका केवळ विद्यार्थ्यांना शिक्षण देण्यापुरती मर्यादित नसून, सामाजिक प्रश्न सोडविण्यासाठीही ते पुढाकार घेऊ शकतात, हे या उपक्रमातून अधोरेखित झाले आहे. पाणीटंचाईवर मात करण्यासाठी लोकसहभाग आणि श्रमदानाचे महत्त्व अधोरेखित करणार्‍या या उपक्रमाचे पंचायत समितीच्या सभापती गौरी मुर्‍हे, उपसभापती दिलीप डुबे आणि जिल्हा परिषद सदस्या तनुजा घनवट आदींनी कौतुक केले.