मंचर : आंबेगाव तालुक्यातील दिव्यांग व्यक्ती आणि निराधार लाभार्थ्यांची गेल्या तीन ते चार महिन्यांपासून पेन्शन जमा झालेली नसल्याने समर्थ दिव्यांग सेवा संस्थेच्या वतीने घोडेगाव येथील तहसीलदार राहुल सारंग यांना निवेदन देण्यात आले. येत्या आठ दिवसांत प्रलंबित पेन्शन लाभार्थ्यांच्या खात्यात जमा न झाल्यास तहसील कार्यालयावर आंदोलन करण्याचा इशारा संस्थेने दिला आहे.

संजय गांधी निराधार अनुदान योजनेतील अनेक दिव्यांग लाभार्थ्यांची प्रकरणे मंजूर होऊनही त्यांच्या खात्यात दोन ते तीन महिन्यांपासून पेन्शन जमा झालेली नाही. तसेच श्रावणबाळ निराधार योजनेतील लाभार्थ्यांनाही तीन ते चार महिन्यांपासून अनुदान मिळालेले नाही. याबाबत संजय गांधी शाखेचे लेखनिक नंदकुमार तारडे यांची वेळोवेळी भेट घेऊन लेखी निवेदने देण्यात आली. मात्र, अद्याप कार्यवाही झाली नसल्याचा आरोप संघटनेने केला आहे.

प्रलंबित पेन्शन तातडीने जमा करावी, तसेच संजय गांधी शाखेतील लेखनिक नंदकुमार तारडे यांना पदावरून हटवून त्यांच्या जागी अन्य अधिकार्‍याची नियुक्ती करावी, अशी मागणी निवेदनाद्वारे करण्यात आली आहे. मागण्यांची दखल न घेतल्यास संबंधित अधिकार्‍यांविरोधात जिल्हाधिकारी कार्यालयाकडे तक्रार करण्यात येईल, असेही संघटनेने स्पष्ट केले.

दिवाळी अवघ्या महिनाभरावर आली असताना पेन्शनअभावी दिव्यांग आणि निराधार लाभार्थ्यांची दिवाळी अंधारात जाण्याची शक्यता आहे. अनेक लाभार्थ्यांच्या उदरनिर्वाहाचा पेन्शन हाच प्रमुख आधार असल्याने प्रशासनाने मानवतेच्या दृष्टिकोनातून तातडीने कार्यवाही करावी, अशी मागणी करण्यात आली आहे. यावेळी समर्थ दिव्यांग सेवा संस्थेचे अध्यक्ष समीर टाव्हरे, सुनील दरेकर, पांडुरंग काळे, मदन इंगवले, भीमाची डांगले, नवनाथ भोर, सविता काळे, शोभा पिंगळे, विद्या बोर्‍हाडे आदी उपस्थित होते.