Teacher Death – शासकीय रुग्णालयाचा कारभार पुन्हा एकदा चर्चेत आला आहे. एका शिक्षिकेसह तिच्या नवजात बाळाचा मृत्यू झाल्याने खळबळ उडाली आहे. या घटनेनंतर मृत महिलेच्या नातेवाइकांनी रुग्णालय प्रशासनावर गंभीर आरोप केले आहेत. शिकाऊ डॉक्टरांकडून उपचार करण्यात आले तसेच गंभीर परिस्थितीत आवश्यक वैद्यकीय सुविधा उपलब्ध करून देण्यात हलगर्जीपणा झाला, असा आरोप नातेवाईकांनी केला आहे.

नातेवाइक आणि डॉक्टरांकडून मिळालेल्या माहितीनुसार, संबंधित शिक्षिका मंगळवारी दुपारी साडेचारच्या सुमारास प्राथमिक तपासणीसाठी रुग्णालयात आल्या होत्या. त्यानंतर सायंकाळी पाच वाजता त्यांना रुग्णालयात दाखल करण्यात आले. सायंकाळी साडेपाचच्या सुमारास त्यांचा रक्तदाब वाढल्याने त्यांना अतिदक्षता विभागात दाखल करण्यात आले. परिस्थिती संवेदनशील असल्याचे सांगत डॉक्टरांनी प्रसूती करण्याचा निर्णय घेतला.

यानंतर सायंकाळी सहा वाजता बाळाची प्रसूती करण्यात आली. यावेळी रूग्णालयात लेव्हल ४ व्हेंटीलेटर नसल्यामुळे रात्री नऊच्या सुमारास बाळाला ससून रुग्णालयात दाखल करण्यात आले. मात्र तेथील डॉक्टरांनी बाळाला मृत घोषित केले. या घटनेनंतर मृत महिलेच्या नातेवाइकांमध्ये संतापाची भावना निर्माण झाली. उपचारादरम्यान नेमकी कोणती वैद्यकीय प्रक्रिया करण्यात आली? बाळाची प्रकृती गंभीर असताना त्याला वेळेत उपचार का मिळाले नाही,

याबाबत नातेवाइकांनी प्रश्न उपस्थित केले आहेत. या घटनेमुळे रुग्णालयातील वैद्यकीय व्यवस्थेवर पुन्हा प्रश्नचिन्ह निर्माण झाले आहे. दरम्यान, मावळचे आमदार सुनील शेळके यांनी बुधवारी रुग्णालयात भेट देऊन घटनेची माहिती घेतली. यावेळी यापूर्वीही अशा स्वरूपाच्या चार ते पाच घटना घडल्या असून, आरोग्य मंत्र्यांकडे या प्रकरणी एसआयटीची स्थापन करण्याची मागणी करणार असल्याचेही त्यांनी सांगितले.

शिकाऊ डॉक्टरांकडून उपचाराचा आरोप
गंभीर परिस्थिती असतानाही रुग्णालयात शिकाऊ डॉक्टरांकडून उपचार करण्यात आल्याचा आरोप नातेवाईकांनी केला आहे. तसेच आवश्यक त्या तज्ज्ञ डॉक्टरांची तत्काळ उपलब्धता होती का, याचीही चौकशी करण्याची मागणी करण्यात आली आहे. नातेवाईकांनी केलेले हे आरोप गंभीर असल्याने त्यांची स्वतंत्र चौकशी होणे गरजेचे आहे. वैद्यकीय उपचारातील प्रत्यक्ष त्रुटी आणि मृत्यूचे नेमके कारण शवविच्छेदन व वैद्यकीय तपासणीनंतरच स्पष्ट होणार असल्याचे पोलीस प्रशासनाने सांगितले. मात्र आमदार शेळके यांनी पोलिसांना तपास सुरू करण्याच्या सूचना दिल्या आहेत.

कार्डियाक रुग्णवाहिकेऐवजी साधी रुग्णवाहिका
या घटनेत आणखी एक गंभीर आरोप करण्यात आला आहे. संवेदनशील परिस्थिती असतानाही कार्डियाक सुविधायुक्त रुग्णवाहिकेऐवजी साध्या रुग्णवाहिकेचा वापर करण्यात आला, असा दावा नातेवाईकांनी केला आहे. गंभीर रुग्णाला स्थलांतरित करताना कोणत्या वैद्यकीय सुविधांची आवश्यकता होती? उपलब्ध रुग्णवाहिकेत आवश्यक उपकरणे आणि प्रशिक्षित कर्मचारी होते का? या बाबींचीही चौकशी होण्याची मागणी होत आहे.