Taranjit Singh Sandhu : दिल्लीला नवीन नायब राज्यपाल मिळाले असून, तरनजीत सिंग संधू (Taranjit Singh Sandhu) हे दिल्लीचे २३ वे नायब राज्यपाल म्हणून बुधवारी, ११ मार्च रोजी शपथ घेणार आहेत. लोक निवास (पूर्वीचे राज निवास) येथे दुपारी १.३० वाजता हा शपथविधी सोहळा पार पडणार असल्याचे अधिकृत सूत्रांनी सोमवारी स्पष्ट केले. दिल्ली उच्च न्यायालयाचे मुख्य न्यायाधीश संधू (Taranjit Singh Sandhu) यांना पद आणि गोपनीयतेची शपथ देतील. या सोहळ्यासाठी लोक निवास येथे सध्या जोरदार तयारी सुरू आहे. विशेष म्हणजे, संधू यांनी सोमवारीच लोक निवासला भेट देऊन मावळते नायब राज्यपाल विनय कुमार सक्सेना यांची भेट घेतली आणि त्यांच्याशी विविध विषयांवर चर्चा केली. भारतीय परराष्ट्र सेवेच्या १९८८ च्या बॅचचे अधिकारी असलेले ६३ वर्षीय तरनजीत सिंग संधू हे भारताचे अत्यंत अनुभवी मुत्सद्दी मानले जातात. विशेषतः भारत-अमेरिका संबंधांमध्ये त्यांची भूमिका अत्यंत महत्त्वाची राहिली आहे. फेब्रुवारी २०२० ते जानेवारी २०२४ या काळात त्यांनी अमेरिकेतील भारताचे राजदूत म्हणून यशस्वी कामगिरी बजावली. याव्यतिरिक्त संयुक्त राष्ट्रांमधील भारताचे स्थायी मिशन आणि वॉशिंग्टन डीसीमध्ये विविध वरिष्ठ पदांवर त्यांनी कार्य केले आहे. विनय कुमार सक्सेना यांची लडाखला रवानगी दिल्लीचे मावळते नायब राज्यपाल विनय कुमार सक्सेना यांची लडाखच्या नायब राज्यपालपदी नियुक्ती करण्यात आली आहे. ते सध्या आपले निवासस्थान स्थलांतरित करण्याच्या प्रक्रियेत असून, शुक्रवारी ते लडाखमध्ये आपल्या नवीन पदाची सूत्रे हाती घेतील.
