नवी दिल्ली : मानहानी प्रकरणात सामाजिक कार्यकर्त्या मेधा पाटकर यांना सुनावलेली शिक्षा सर्वोच्‍च न्‍यायालयाने कायम ठेवली आहे. मात्र, सर्वोच्च न्यायालयाने त्यांच्यावर लावण्यात आलेला दंड आणि प्रोबेशनची शिक्षा रद्द केली आहे. या प्रकरणाची सुनावणी न्यायमूर्ती एम. एम. सुंदरेश आणि न्यायमूर्ती एन.के. सिंह यांच्या खंडपीठासमोर पार पडली. या प्रकरणाची सुनावणी केली.

मेधा पाटकर यांनी दिल्ली उच्च न्यायालयाच्या निर्णयाला सर्वोच्च न्यायालयात आव्हान दिले होते. हे प्रकरण दिल्लीचे उपराज्यपाल विनय कुमार सक्सेना यांनी दाखल केले होते. हे प्रकरण 2000 मधील आहे. त्यावेळी व्ही. के. सक्सेना गुजरातमधील एका सामाजिक संस्थेचे अध्यक्ष होते. त्याच वेळी मेधा पाटकर यांनी सक्सेना यांच्यावर मानहानीकारक आरोप केले होते. 1 जुलै 2024 रोजी, दंडाधिकारी न्यायालयाने भारतीय दंड संहितेच्या कलम 500 (मानहानी) अंतर्गत पाटकर यांना दोषी ठरवले. त्यांना पाच महिन्यांच्या साध्या कारावासाची शिक्षा आणि 10 लाख रुपयांचा दंड ठोठावण्यात आला.

दरम्यान, नंतर सत्र न्यायालयाने त्यांची सुटका प्रोबेशनच्या अटीवर केली. त्यासाठी 25,000 रुपयांचा प्रोबेशन बॉन्ड आणि 1 लाख रुपयांचा दंड भरण्याची अट ठेवली होती. उच्च न्यायालयाने हा निर्णय कायम ठेवला. मात्र प्रोबेशनच्या काही अटींमध्ये सवलत दिली होती. आता सर्वोच्च न्यायालयाने शिक्षा कायम ठेवली असली तरी दंड आणि प्रोबेशनची शिक्षा रद्द केली आहे. या निर्णयामुळे मेधा पाटकर यांना कारावासाची शिक्षा अद्याप भोगावी लागणार आहे.