पुणे  – शहरातील टेकड्या म्हणजे पुणेकरांचे ऑक्सिजन आहे. त्यांचा ऱ्हास होता कामा नये. पर्यावरणाचे महत्त्व जाणणारे आणि विकासाचे व्हिजन असलेल्या चंद्रकांत मोकाटे यांना आपण साथ द्यावी, असे आवाहन माजी खासदार ऍड. वंदना चव्हाण यांनी हास्य क्लब सदस्यांच्या मेळाव्यात केले.

कोथरूड विधानसभा मतदारसंघातील महाविकास आघाडीचे उमेदवार व माजी आमदार चंद्रकांत मोकाटे यांच्या प्रचारार्थ ऍड. वंदना चव्हाण हास्य क्लब सदस्यांच्या व्यायामाच्या प्रात्यक्षिकात सहभागी झाल्या. त्या वेळी सदस्यांशी बोलताना चव्हाण म्हणाल्या, एकेकाळी स्वच्छ हवा आणि ऊबदार हवामान असलेल्या पुणे शहराती हवामान बदलत चालले आहे.

राजरोस टेकड्या फोडणे, झाडे तोडणे या घटना सुरू आहेत. त्यावर कोणाचेही नियंत्रण नाही. त्याबाबत मी आंदोलन केले, त्या वेळी चंद्रकांत मोकाटे आणि शिवसेनेच्या कार्यकर्त्यांनी मला साथ दिली. या वेळी मोकाटे यांनी पुण्याचे पर्यावरण चांगले राहावे, यासाठी मी सैदव जागरूक असेन, असा विश्वास व्यक्त केला. या वेळी राकेश मुरकुटे, मुकुंद बालवडकर उपस्थित होते.

उच्च न्यायालयाच्या बेंचसाठी प्रयत्न –
मुंबई उच्च न्यायालयाचे खंडपीठाचे सर्किट बेंच पुण्यात स्थापन करण्यासाठी आपण सामूहिकरीत्या प्रयत्न करू, असे आश्‍वासन चंद्रकांत मोकाटे यांनी वकिलांच्या मेळाव्यात दिले. या वेळी ऍड. राजेंद्र देशमुख, ऍड. भगवानराव साळुंखे, ऍड. लक्ष्मण राणे, ऍड. मोनिका वाईकर यांसह अन्य वकिलवर्ग उपस्थित होते. नवोदित वकिलांना राज्य व केंद्र सरकारने मानधन सुरू करावे. वकिलांना संरक्षण देण्यासाठी कायदा करण्यात यावा, अशी मागणी करण्यात आली.