नागपूर : महायुती सरकारच्या मंत्रिमंडळाचा विस्तार पार पडून दोन दिवस झाले मात्र अद्यापदेखील खातेवाटप जाहीर झालेले नाही. खातेवाटपावरून शिवसेना आणि अजित पवार गटामध्ये मोठ्या प्रमाणात नाराजी असल्याचे पाहायला मिळत आहे. यादरम्यान भाजप एकनाथ शिंदेंना अजून एक धक्का देण्याच्या तयारीत आहेत. विधानपरिषद सभापतीपद भाजप आपल्याकडे घेण्याच्या तयारीत आहेत त्यामुळे शिवसेनेच्या नेत्या नीलम गोऱ्हे यांचा पत्ता कट होण्याची चिन्ह आहेत.

भाजपकडून ‘या’ नेत्याच्या नावाची चर्चा
महायुती सरकारचं पहिलं हिवाळी अधिवेशन नागपूरमध्ये सुरू आहे. याच अधिवेशनामध्ये विधानपरिषद सभापती निवडणुकीचा कार्यक्रम जाहीर होणार आहे. मागील दोन वर्षांपासून हे पद रिक्त आहे. त्यामुळे सभापती कोण होणार अशी चर्चा रंगली आहे. महायुतीमध्ये भाजप हा मोठा भाऊ आहे. त्यामुळे आता सभापतीपदासाठी राम शिंदे यांचं नाव समोर आलं आहे. काही दिवसांपूर्वी पार पडलेल्या विधानसभा निवडणुकीत राम शिंदेचा अवघ्या काही मतांनी पराभव झाला होता.

सभापतीपद हे रामराजे निंबाळकर यांच्याकडे होतं. निंबाळकर पायउतार झाल्यानंतर पद रिक्त आहे. त्याच दरम्यान उपसभापती नीलम गोऱ्हे यांनी कार्यभार पाहिला. आता सभापतीसाठी भाजप आग्रही आहे. भाजपकडे सर्वाधिक जागा आहे. त्यामुळे दोन्ही सभागृहामध्ये आपलाच सभापती असावा असा भाजपकडून दावा करण्यात आला आहे.