sunil shetty: बॉलीवूडचे ज्येष्ठ अभिनेते सुनील शेट्टी यांनी सोशल मीडियावर त्यांच्या आणि त्यांच्या कुटुंबाच्या फोटोंचा परवानगीशिवाय वापर केल्याबद्दल मुंबई उच्च न्यायालयात याचिका दाखल केली आहे. डिजिटल जगतात वाढत्या डीपफेक फोटो-व्हिडिओंमुळे कलाकारांना भेडसावणाऱ्या त्रासाच हे आणखी एक उदाहरण ठरल आहे.

सुनील शेट्टी यांनी दाखल केलेल्या याचिकेत म्हटलं आहे की, काही वेबसाईट्स आणि सोशल मीडिया पेजेस त्यांच्या आणि त्यांच्या कुटुंबीयांच्या फोटोंचा व्यावसायिक उद्देशाने गैरवापर करत आहेत. त्यांच्या परवानगीशिवाय हे फोटो जाहिरातींसाठी वापरले जात असून, त्यामुळे लोकांमध्ये चुकीचा संदेश जात आहे.

त्यांच्या वतीने वकील बीरेंद्र सराफ यांनी न्यायालयात सांगितले की, सुनील शेट्टी यांच्यासोबतच त्यांच्या नातीचा म्हणजेच आथिया शेट्टी आणि क्रिकेटपटू के.एल. राहुल यांची मुलगी इवारा हिचा बनावट फोटो काही वेबसाइट्सवर टाकण्यात आला आहे. या बनावट फोटोंमुळे त्यांच्या कुटुंबाच्या गोपनीयतेचा भंग झाला असून, त्यावर तातडीने कारवाई करावी, अशी मागणी याचिकेत करण्यात आली आहे.

सुनील शेट्टी यांनी न्यायालयाकडे विनंती केली आहे की, संबंधित वेबसाईट्स आणि सोशल मीडिया अकाउंट्सना त्यांचे फोटो आणि व्हिडिओ तत्काळ काढून टाकण्याचे तसेच भविष्यात असा चुकीचा वापर पुन्हा होऊ नये यासाठी स्पष्ट निर्देश द्यावेत.

याचिकेत असंही नमूद करण्यात आलं आहे की, काही रिअल इस्टेट एजन्सीच्या वेबसाईट्सवर सुनील शेट्टींचे फोटो वापरले जात असून, त्यामुळे लोकांची दिशाभूल होत आहे. शिवाय त्यांच्या नावाने बनावट एजंट आणि फेक सोशल मीडिया अकाऊंट्स सक्रिय असून, ते स्वतःला सुनील शेट्टींचे प्रतिनिधी असल्याचा दावा करत आहेत.

या प्रकरणावर न्यायमूर्ती आरिफ डॉक्टर यांच्या खंडपीठाने शुक्रवारी दोन्ही बाजूंचे म्हणणे ऐकून घेतले असून, आदेश राखून ठेवला आहे.
वाढत्या फेक न्यूज, डीपफेक व्हिडिओ आणि फोटोंच्या गैरवापरामुळे अनेक नामांकित कलाकार चिंतेत आहेत. सुनील शेट्टींची ही याचिका अशा चुकीच्या प्रवृत्तीविरुद्ध एक महत्त्वपूर्ण पाऊल मानले जात आहे.