१) मी विधानसभा निवडणूक लढवणार नाही : बबनराव लोणीकर भाजपचे आमदार बबनराव लोणीकर यांनी विधानसभा निवडणूक न लढवण्याची घोषणा करत जालना जिल्ह्याच्या राजकारणात खळबळ उडवलीय. वाढदिवसानिमित्त वाटूर येथे झालेल्या कार्यक्रमात त्यांनी ही घोषणा केलीय. “मी थकलो नाही, पण आता नव्या पिढीला संधी द्यायची वेळ आलीय. माझं पोरगं वेटिंगवर आहे,” असं म्हणत त्यांनी विधानसभा न लढवण्याचे स्पष्ट केलंय. सक्रिय राजकारणातून निवृत्त होणार नसून, पक्षाने संधी दिल्यास लोकसभा निवडणूक लढवण्याची तयारी त्यांनी दर्शवलीय. परतूर मतदारसंघात त्यांची मजबूत पकड असताना त्यांनी स्वेच्छेने माघार घेण्याचे संकेत दिल्याने नव्या नेतृत्वाचा मार्ग मोकळा होण्याची शक्यता आहे. या निर्णयामुळे जिल्ह्यातील राजकीय समीकरणांमध्ये मोठे बदल होण्याची चर्चा रंगलीय. २) नागपूरमध्ये स्फोटात 16 जणांचा बळी नागपूर जिल्ह्यातील काटोल तालुक्यात राऊळगाव येथील SBL कंपनीत रविवारी सकाळी सुमारे पावणे आठच्या सुमारास भीषण स्फोट झाला. या दुर्घटनेत तब्बल 16 जणांचा मृत्यू झाला असून 24जण गंभीर जखमी झालेत. या घटनेच्या वेळी विविध युनिटमध्ये 30 हून अधिक कामगार कार्यरत होते. स्फोटानंतर काही कर्मचारी ढिगाऱ्याखाली अडकल्याची भीती व्यक्त करण्यात येतेय. जखमींना नागपूरमधील शासकीय व खासगी रुग्णालयांत दाखल करण्यात आलंय. स्फोटाचे नेमके कारण अद्याप स्पष्ट झालेले नाही. दरम्यान, या दुर्घटनेत मृत्यू झालेल्यांच्या वारसांना 5 लाख रुपये आर्थिक मदत राज्य सरकार करेल, असं मुख्यमंत्री देवेंद्र फडणवीस यांनी जाहीर केलंय. ३) सुनेत्रा पवार यांच्यावर मोठी जबाबदारी सुनेत्रा पवार यांच्यावर आणखी एक महत्त्वाची जबाबदारी सोपवण्यात आलीय. पुणे जिल्हा शिक्षण मंडळ अध्यक्षपदी त्यांची आज बिनविरोध निवड झालीय. मंडळाच्या सभासदांच्या उपस्थितीत झालेल्या बैठकीत हा निर्णय एकमताने घेण्यात आला. यापूर्वी हे पद अजित पवार यांच्याकडे होते. गेल्या २० वर्षांत त्यांच्या नेतृत्वाखाली मंडळाने ग्रामीण भागात शिक्षणाचा मोठा विस्तार केला, अद्ययावत इमारती उभारल्या आणि एक लाखांहून अधिक विद्यार्थ्यांना दर्जेदार शिक्षणाची संधी उपलब्ध करून दिली. ४) पोटातील गाठीऐवजी महिलेचं गर्भाशयच काढलं पुणे शहरात वैद्यकीय निष्काळजीपणाचा गंभीर प्रकार उघड झालाय. पोटातील गाठ काढण्याच्या शस्त्रक्रियेसाठी दाखल झालेल्या केशवनगर येथील ३५ वर्षीय महिलेचे गर्भाशयच काढल्याचा धक्कादायक प्रकार उघडकीस आलाय. या प्रकरणी मुंढवा रस्त्यावरील साई केअर रुग्णालयातील संबंधित डॉक्टरांविरोधात मांजरी पोलिस ठाण्यात गुन्हा दाखल करण्यात आलाय. ही घटना १५ सप्टेंबर २०२५ रोजी घडलीय. तक्रारदार महिलेने गाठ काढण्यास संमती दिली होती, मात्र गर्भाशय काढण्यास परवानगी दिली नव्हती, असं नमूद केलाय. डिस्चार्ज समरीत गर्भाशय काढल्याचा उल्लेख नसल्याने संशय निर्माण झाला असून पुढील तपास सुरू आहे. ५) ममता बॅनर्जीकडून राज्यसभेसाठी ४ उमेदवारांची घोषणा ममता बॅनर्जी यांनी राज्यसभा निवडणुकीसाठी चार उमेदवारांची घोषणा केलीय. यामध्ये बाबुल सुप्रियो, राजीव कुमार, मनेका गोस्वामी आणि अभिनेत्री कोयल मल्लिक यांचा समावेश आहे. या घोषणेमुळे तृणमूल काँग्रेसच्या राज्यसभेतील जागांची संख्या १३ वरून १७ वर जाण्याची शक्यता आहे. सामाजिक आणि राजकीय संतुलन साधत विविध क्षेत्रांतील व्यक्तींना संधी देण्याची ही रणनीती मानली जात आहे. राज्यसभेतील वाढती संख्या केंद्रातील राजकारणात टीएमसीची ताकद आणि प्रभाव अधिक मजबूत करू शकते, अशी चर्चा राजकीय वर्तुळात सुरू आहे. ६) इराणच्या सर्वोच्च नेतेपदी अयातुल्ला अराफी अयातुल्ला अली खामेनी यांच्या मृत्यूनंतर अयातुल्ला अलीरेजा अराफी यांची इराणच्या सर्वोच्च नेतेपदी तात्पुरती नियुक्ती करण्यात आलीय. अमेरिकेच्या हल्ल्यानंतर काही तासांतच हा निर्णय घेण्यात आलाय. ६७ वर्षीय अराफी हे अनुभवी धर्मगुरू असून खामेनी यांचे निकटवर्तीय मानले जातात. ते तज्ञांच्या सभेचे उपाध्यक्ष आणि इराणच्या मदरसा व्यवस्थेचे प्रमुख आहेत. शनिवारी झालेल्या अमेरिका-इस्रायल लष्करी हल्ल्यात इराणचे नेतृत्व करणारे ८६ वर्षीय खामेनी ठार झाले. या कारवाईत लष्करी तळ, सरकारी सुविधा आणि वरिष्ठ कमांड साइट्सना लक्ष्य करण्यात आले. ७) खामेनींच्या मृत्यूचे पाकिस्तानमध्ये पडसाद अयातुल्ला अली खामेनी यांच्या मृत्यूनंतर पाकिस्तानमध्ये तीव्र पडसाद उमटलेत. कराची शहरात शिया समुदायाकडून मोठ्या प्रमाणावर आंदोलन करण्यात आले. आंदोलनकर्त्यांनी अमेरिकन वाणिज्य दूतावास कराची बाहेर जमून अमेरिकेविरोधात घोषणाबाजी केली. तणाव वाढताच काही आंदोलकांनी कॉन्सुलेट परिसरात घुसून तोडफोड केल्याची माहिती आहे. या हिंसाचारात १४ जणांचा मृत्यू तर २० जण जखमी झाल्याचे वृत्त आहे. परिस्थिती नियंत्रणात आणण्यासाठी पोलिसांनी अश्रुधुराचा वापर केला तसेच गोळीबार केल्याचेही समोर आलंय. परिसरातील प्रमुख रस्ते बंद करण्यात आले असून अतिरिक्त पोलिस बंदोबस्त तैनात करण्यात आलाय. ८) इराण-अमेरिका युद्धामुळे सोनं-चांदी महागलं इराण-अमेरिका तणावाचा थेट परिणाम सराफा बाजारावर दिसू लागलाय. इराण आणि अमेरिका यांच्यातील युद्धजन्य परिस्थितीमुळे सोन्या-चांदीच्या दरात ऐतिहासिक वाढ झालीय. गेल्या २४ तासांत सोन्याच्या दरात तब्बल ११ हजार रुपयांची वाढ झाली असून जीएसटीसह प्रति १० ग्रॅम दर १ लाख ७५ हजार रुपयांवर पोहोचलाय. तर चांदीच्या दरात २५ हजार रुपयांची उसळी घेत ती ३ लाख ३ हजार रुपयांवर गेलीय. लग्नसराईच्या तोंडावर झालेल्या या दरवाढीमुळे सर्वसामान्यांचे बजेट कोलमडलेय. तज्ज्ञांच्या मते, तणाव कायम राहिल्यास सोन्याचे दर २ लाखांच्या पुढे जाण्याची शक्यता आहे. ९) द केरळ स्टोरी २च्या कमाईत दुसऱ्या दिवशी मोठी वाढ विपुल अमृतलाल शाह निर्मित “द केरळ स्टोरी २” हा चित्रपट वादानंतर २७ फेब्रुवारी रोजी प्रदर्शित झालाय. प्रदर्शनापूर्वी प्रकरण केरळ उच्च न्यायालय पर्यंत पोहोचले होते. अखेरीस स्थगिती मिळाल्यानंतर चित्रपटाचा मार्ग मोकळा झाला. बॉक्स ऑफिसवर पहिल्या दिवशी चित्रपटाला सौम्य प्रतिसाद मिळाला. सॅकनिल्कच्या अहवालानुसार, ओपनिंग डे ला केवळ ७.५ लाख रुपयांची कमाई झाली. मात्र दुसऱ्या दिवशी कमाईत मोठी वाढ झाली आणि अंदाजे ४.६५ कोटी रुपयांचा गल्ला जमवला. दोन दिवसांत एकूण ५.४० कोटी रुपयांची कमाई करत चित्रपटाने दुसऱ्या दिवशी जोरदार उभारी घेतल्याचे चित्र दिसत आहे. १०) आयपीएल २०२६ साठी CSK ची नवी जर्सी लाँच आगामी आयपीएल २०२६ हंगामासाठी चेन्नई सुपर किंग्सने (CSK) रविवारी सकाळी ७:०७ वाजता आपल्या नव्या जर्सीचे अनावरण केले. या विशेष व्हिडीओने एमएस धोनीच्या पुनरागमनावर शिक्कामोर्तब केले असून चाहत्यांना सुखद धक्का दिला आहे. गेल्या हंगामातील खराब कामगिरीनंतर संघात मोठे फेरबदल करण्यात आले आहेत. रवींद्र जडेजा आणि सॅम करन यांना डच्चू देण्यात आला असून, स्टार फलंदाज संजू सॅमसनचे संघात आगमन झाले आहे. ऋतुराज गायकवाड संघाचे नेतृत्व करेल, तर धोनी सर्व सामन्यांसाठी उपलब्ध नसेल असे संकेत मिळत आहेत. नव्या जर्सीसह सीएसके आता नव्या जोमाने मैदानात उतरण्यास सज्ज झाली आहे.
