Sunetra Pawar – पुणे ग्रँड टूर सायकल स्पर्धेच्या यशस्वी आयोजनातून आपण एक आंतरराष्ट्रीय दर्जाचा उपक्रम उभा करण्याचे आव्हान अत्यंत कमी कालावधीत साध्य केले. आता दुसऱ्या पर्वाच्या आयोजनाच्या माध्यमातून या स्पर्धेची उंची, दर्जा, व्याप्ती आणि प्रभाव अजून पुढे न्यायचा असून, नवा मापदंड निर्माण करण्यासाठी सर्व यंत्रणांनी समन्वयाने काम करावे, असे आवाहन उपमुख्यमंत्री सुनेत्रा पवार यांनी केले.

विभागीय आयुक्त कार्यालयात आयोजित पुणे ग्रँड टूर सायकल स्पर्धेच्या आढावा बैठकीत त्या बोलत होत्या. या वेळी जिल्हा परिषद अध्यक्ष वीरधवल जगदाळे, विभागीय आयुक्त शीतल तेली-उगले, पुणे शहर पोलीस आयुक्त अमितेश कुमार, पिंपरी चिंचवड पोलीस आयुक्त विनय कुमार चौबे, पुणे महापालिका आयुक्त नवल किशोर राम, पीएमआरडीएचे आयुक्त डॉ. अभिजीत चौधरी, जिल्हाधिकारी जितेंद्र डुडी,

क्रीडा व युवक सेवा आयुक्त दीपक सिंगला, जिल्हा परिषदेचे मुख्य कार्यकारी अधिकारी गजानन पाटील, पुणे ग्रामीण पोलीस अधीक्षक संदीपसिंह गिल्ल, सीएफआयचे महासचिव मनिंदर पाल सिंह (दूरदृष्य प्रणालीद्वारे) आदी उपस्थित होते. उपमुख्यमंत्री पवार म्हणाल्या, की अगदी शहरापासून ग्रामीण भागापर्यंत पुणे ग्रँड टूरचा आनंद सर्वांनी घेतला. मुख्यमंत्री देवेंद्र फडणवीस यांच्या पाठबळाने ही स्पर्धा यशस्वीरीत्या आयोजित करण्यात आली.

या ग्रँड टूरची संकल्पना, त्यामागील दूरदृष्टी आणि उपक्रम प्रत्यक्षात आणण्याचा पाया तत्कालीन उपमुख्यमंत्री स्वर्गीय अजित पवार यांनी रचला. पुणे जागतिक दर्जाच्या क्रीडा स्पर्धांचे केंद्र बनावे, महाराष्ट्रातील युवकांना सायकलिंगसारख्या उत्कृष्ट क्रीडा प्रकारांसाठी व्यासपीठ मिळावे, ही त्यांची दूरदृष्टी होती. आगामी स्पर्धेमुळेही आपल्या ऐतिहासिक वास्तू, ऐतिहासिक स्थळे जगाच्या पटलावर येऊन पर्यटनाला आणखी चालना मिळेल, असा विश्वासही पवार यांनी व्यक्त केला.