Maharashtra Politics : माजी खासदार नवनीत राणा आणि राष्ट्रवादी काँग्रेसच्या वरिष्ठ नेत्या सुनेत्रा पवार यांच्या अलीकडील भेटीनंतर राज्याच्या राजकीय वर्तुळात चर्चांना वेग आला आहे. नवनीत राणा राष्ट्रवादी काँग्रेसमध्ये प्रवेश करून राज्यसभेवर जाणार का, याबाबत तर्क-वितर्कांना उधाण आले आहे. सूत्रांच्या माहितीनुसार, राज्यसभा उमेदवारीसाठी राणा दाम्पत्यासमोर राष्ट्रवादीत प्रवेश करण्याची अट ठेवण्यात आल्याची चर्चा आहे. (Maharashtra Politics)

मिळालेल्या माहितीनुसार, राज्यसभेच्या संभाव्य उमेदवारीसंदर्भात नवनीत राणा आणि आमदार रवी राणा यांनी प्रथम मुख्यमंत्री देवेंद्र फडणवीस यांची भेट घेतली होती. त्यानंतर त्यांनी सुनेत्रा पवार यांची भेट घेतल्याचे सांगितले जात आहे. या भेटीनंतर राष्ट्रवादीत प्रवेशाचा प्रस्ताव पुढे आल्याची माहिती सूत्रांकडून समोर येत आहे. (Maharashtra Politics)

याचबरोबर रवी राणा यांना मंत्रिमंडळात संधी देण्याबाबतही चर्चा झाल्याचे बोलले जात आहे. मात्र यासंदर्भात कोणतीही अधिकृत घोषणा करण्यात आलेली नाही. (Maharashtra Politics)

दरम्यान, राष्ट्रवादी काँग्रेसचे नेते अमोल मिटकरी यांनी या चर्चांवर प्रतिक्रिया देताना स्पष्ट केले की, एखाद्या व्यक्तीला पक्षाकडून उमेदवारी हवी असल्यास त्या व्यक्तीने प्रथम पक्षाचे सदस्य असणे आवश्यक आहे. नवनीत राणा आणि सुनेत्रा पवार यांची भेट ही कौटुंबिक होती की राजकीय, याबाबत सध्या ठोस माहिती उपलब्ध नसल्याचे त्यांनी सांगितले. (Maharashtra Politics)

मिटकरी यांनी पुढे म्हटले की, सुनेत्रा पवार यांच्या राजीनाम्यामुळे रिक्त झालेली राज्यसभेची जागा ही राष्ट्रवादी काँग्रेसची आहे आणि त्या जागेवर पक्षाशी निष्ठावान असलेल्या कार्यकर्त्यालाच संधी मिळायला हवी. “कोणीही दुसऱ्या पक्षातून येऊन थेट राज्यसभेच्या जागेची मागणी करणे म्हणजे हे काही खेळण्यांचे दुकान नाही,” असा टोला त्यांनी लगावला. (Maharashtra Politics)

राज्यसभेच्या उमेदवारीबाबत अंतिम निर्णय पक्ष नेतृत्व घेणार असल्याचे सांगताना, या जागेबाबतचा अधिकार सुनेत्रा पवार आणि राष्ट्रवादीच्या वरिष्ठ नेत्यांकडे असल्याचेही त्यांनी स्पष्ट केले. (Maharashtra Politics)

दरम्यान, नवनीत राणा यांच्या संभाव्य पक्षप्रवेशाबाबत आणि राज्यसभा उमेदवारीबाबत अधिकृत घोषणा अद्याप झालेली नसली तरी या घडामोडींमुळे राज्याच्या राजकारणात नव्या चर्चांना तोंड फुटले आहे. (Maharashtra Politics)