Sugar Industry – आगामी सणासुदीच्या काळात देशातील साखरेचा पुरवठा सुरळीत राहावा तसेच साखरेच्या दरांमध्ये स्थिरता राहावी, यासाठी 2026-27 चा ऊस गाळप हंगाम नेहमीपेक्षा 10 ते 15 दिवस आधी सुरू करण्याचा निर्णय साखर उद्योगातील प्रमुख संघटनांनी घेतला आहे. हवामान आणि कृषी परिस्थिती अनुकूल राहिल्यास लवकर गाळप सुरू करण्यात येणार असल्याचे इंडियन शुगर अँड बायो-एनर्जी मॅन्युफॅक्चरर्स असोसिएशन तसेच नॅशनल फेडरेशन ऑफ को-ऑपरेटिव्ह शुगर फॅक्टरीज यांनी स्पष्ट केले आहे.

ऊस गाळप हंगाम लवकर सुरू केल्याने साखर कारखान्यांसमोर आर्थिक अडचणी निर्माण होण्याची शक्यता आहे. हंगामाच्या सुरुवातीला उसामध्ये साखरेचे प्रमाण तुलनेने कमी असल्याने साखरेचा उतारा घटण्याची शक्यता आहे. परिणामी साखरेचे उत्पादन कमी होण्याबरोबरच प्रतिकिलो उत्पादन खर्चातही वाढ होऊ शकते, अशी चिंता साखर उद्योगातील संघटनांनी व्यक्त केली आहे.

साखर उद्योगातील संघटनांच्या म्हणण्यानुसार, साखरेचा उत्पादन खर्च सुमारे 42 रुपये प्रतिकिलो आहे. मात्र, जुलैअखेर साखरेचा सरासरी विक्रीदर 40 ते 40.50 रुपये प्रतिकिलो राहिला आहे. त्यामुळे साखर कारखान्यांना आधीपासूनच आर्थिक आव्हानांचा सामना करावा लागत असताना लवकर गाळप सुरू केल्यास अतिरिक्त आर्थिक भार पडण्याची शक्यता आहे.

अतिरिक्त विक्री कोट्याची मागणी
लवकर गाळपामुळे होणार्‍या संभाव्य आर्थिक नुकसानीची भरपाई करण्यासाठी केंद्र सरकारने साखर विक्रीचा अतिरिक्त कोटा मंजूर करावा, साखरेचा उतारा कमी झाल्यास त्याची भरपाई द्यावी किंवा अन्य स्वरूपात आर्थिक मदत उपलब्ध करून द्यावी, अशी मागणी साखर उद्योगातील संघटनांनी केली आहे. साखरेचा देशांतर्गत पुरवठा सुरळीत ठेवण्याच्या दृष्टीने कारखान्यांनी घेतलेल्या या निर्णयाला सरकारनेही आवश्यक सहकार्य करावे, अशी अपेक्षा व्यक्त करण्यात आली आहे.