पुणे – शहरात पावसाळ्यात दुरुस्त केलेल्या खड्ड्यांचा अहवाल, तसेच खर्चाची माहिती सादर करा, असे आदेश मनपा अतिरिक्‍त आयुक्‍त डॉ. कुणाल खेमणार यांनी पथ तसेच ड्रेनेज विभाग विभागास दिले आहेत.

एका बाजूला खड्डे दुरुस्तीसाठी मोठ्या प्रमाणात खर्च केला जात असला, तरी नेमक्‍या किती ठिकाणी रस्त्यांची दुरुस्ती केली याची कोणतीही माहिती ठेवण्यात आलेली नाही. केवळ किती डांबर आणि खडी वापरली, याचीच माहिती देण्यात आल्याने हे अहवाल सादर करण्याचे आदेश दिल्याचे डॉ. खेमणार यांनी स्पष्ट केले.

शहरात ड्रेनेज तसेच पाणीपुरवठा योजनांच्या नावाखाली रस्ते खोदाई करण्यात आली आहे. त्यानंतर हे रस्ते पूर्ववत करणे आवश्‍यक असताना दोन्ही विभागांनी जेवढी खोदाई केली, तेवढेच रस्ते दुरुस्त केले. तर, पथ विभागानेही या दोन्ही विभागांमुळे रस्त्यांची दुरवस्था झाल्याचे सांगत जमेल तशी रस्ते दुरुस्ती केली होती. परिणामी, रस्त्यांची दैना झाली आहे.