नवी दिल्ली : समय रैनाच्या इंडियाज गॉट लेटेंट या शोमधील अश्लील विनोदाबद्दल इंडियन सिने वर्कर्स असोसिएशनने केंद्रीय गृहमंत्री अमित शहा आणि माहिती आणि प्रसारण मंत्री अश्विनी वैष्णव यांना पत्र लिहून शोवर बंदी घालण्याची आणि त्याच्या निर्मात्यांवर कायदेशीर कारवाई करण्याची मागणी केली आहे.

युट्यूबर आणि पॉडकास्टर रणवीर अलाहबादियाचा इंडियाज गॉट लेटेंट चा वादग्रस्त भाग युट्यूबने ब्लॉक केला आहे. माहिती आणि प्रसारण मंत्रालयातील वरिष्ठ सल्लागार कांचन गुप्ता यांनी ही माहिती दिली. या भागात पालकांबद्दल अश्लील टिप्पण्या केल्याबद्दल अलाहाबादिया आणि संपूर्ण टीमविरुद्ध मुंबई आणि इंदूरसह देशातील अनेक शहरांमध्ये गुन्हे दाखल करण्यात आले आहेत. महाराष्ट्र पोलिसांच्या सायबर सेलने तपास सुरू केला आहे.

राष्ट्रीय महिला आयोगाला समन्स

दरम्यान, राष्ट्रीय महिला आयोगाने रणवीर अलाहाबादिया, समय रैना आणि इतरांना समन्स बजावले आहे. या प्रकरणाची सुनावणी १७ फेब्रुवारी रोजी होणार आहे. रणवीर अलाहाबादिया, समय रैना, अपूर्व मखीजा, जसप्रीत सिंग आणि आशिष चंचलानी तसेच शोचे निर्माते तुषार पुजारी आणि सौरभ बोथरा यांसारख्या कंटेंट निर्मात्यांनी केलेल्या अश्लील आणि आक्षेपार्ह टिप्पण्या आयोगाने गांभीर्याने घेतल्या आहेत. तथापि, अलाहाबादियाने त्याच्या वादग्रस्त वक्तव्याबद्दल माफी मागितली आहे.

भोपाळला येऊ नका असा इशारा दिला.

रणवीर आणि समय रैना यांच्या विरोधात भोपाळमध्ये हिंदू संघटनाही एकत्र येत आहेत. हिंदू संघटना संस्कृती बचाओ मंचने दोघांच्याही व्हायरल व्हिडिओवर तीव्र प्रतिक्रिया व्यक्त केली आहे आणि इशारा दिला आहे की, दोघांनीही भोपाळला येण्याचा प्रयत्न करू नये, संस्कृती बचाओ मंचचे कार्यकर्ते त्यांना सोडणार नाहीत.