अमरावती- येथे विनापरवाना छत्रपती शिवाजी महाराजांचा पुतळा बसवण्याची जणू स्पर्धा सुरु झाली आहे. 12 जानेवारीला आमदार रवी राणा यांनी महापालिकेच्या परवानगीशिवाय राजापेठ उड्डाणपुलावर छत्रपती शिवाजी महाराजांचा पुतळा बसवला होता. तर काल रातोरात शिवसेना तालुका प्रमुख गोपाल पाटील अरबट यांनी दर्यापूरमध्ये पेट्रोलपंप चौकात शिवाजी महाराजांचा पुतळा बसवला. दरम्यान रवी राणा यांच्याकडून बसवण्यात आलेला पुतळा महापालिकेनं हटवला आहे. काल रात्रीच पोलीस फौजफाट्यासह महापालिकेचे पथक राजापेठ उड्डाणपुलावर दाखल झाले. तर आमदार रवी राणा आणि त्यांच्या खासदार पत्नी नवनीत राणा कौर यांना नजरकैदेत ठेवण्यात आले आहे. दुसरीकडे शिवसेनेने दर्यापूरमध्ये बसवलेल्या पुतळ्याच्या ठिकाणीही मोठा पोलीस बंदोबस्त तैनात करण्यात आलाय. त्याच बरोबर पोलिसांनी शिवसेना तालुकाप्रमुखासह त्यांच्या काही कार्यकर्त्यांना ताब्यात घेतले आहे. कोणताही अनुचित प्रकार घडू नये यासाठी पोलिसांचा मोठा फौज फाटा तैनात करण्यात आला आहे.
