Gunaratna Sadavarte : पुण्यातील शासकीय तंत्रनिकेतन महाविद्यालयात छत्रपती शिवाजी महाराज, डॉ. बाबासाहेब आंबेडकर आणि महात्मा ज्योतिबा फुले यांच्या प्रतिमांच्या रांगेत पंतप्रधान नरेंद्र मोदी यांचा फोटो लावण्यात आल्याने सुरू झालेला वाद आता महाराष्ट्राच्या राजकारणात चांगलाच पेटला आहे.

महाराष्ट्र नवनिर्माण विद्यार्थी सेनेचे अध्यक्ष अमित ठाकरे यांनी या फोटोच्या मांडणीवर आक्षेप घेत मोदींचा फोटो हटवण्यास सांगितल्यानंतर भाजप आणि मनसेमध्ये जोरदार आरोप-प्रत्यारोप सुरू झाले. या प्रकरणी अमित ठाकरे आणि इतर मनसे कार्यकर्त्यांविरोधात गुन्हाही दाखल झाला असून, तीन मनसे कार्यकर्त्यांना अटक करण्यात आली होती.

या सगळ्या वादाच्या पार्श्वभूमीवर मनसे अध्यक्ष राज ठाकरे यांनी पहिल्यांदाच सविस्तर भूमिका मांडत मुलगा अमित ठाकरे यांच्या भूमिकेचे समर्थन केले. “छत्रपती शिवाजी महाराज, बाबासाहेब आंबेडकर आणि फुले यांच्या रांगेत दुसरं कोणी बसू शकत नाही.

सरकारी कार्यालयात पंतप्रधान नरेंद्र मोदी यांचा फोटो असायला हवा, कारण ते देशाचे पंतप्रधान आहेत. मात्र तो फोटो दुसऱ्या भिंतीवर असायला हवा,” अशी भूमिका राज ठाकरे यांनी मांडली.

राज ठाकरेंच्या या भूमिकेनंतर आता ज्येष्ठ वकील गुणरत्न सदावर्ते यांनी आक्रमक पवित्रा घेत थेट ठाकरे कुटुंबावर निशाणा साधला आहे. “तुमच्या मुलाला विचारा, शिवरायांच्या पुतळ्याच्या फोटोच्या वर बाळासाहेब ठाकरेंना बसवलं जाऊ शकतं का?” असा थेट सवाल सदावर्ते यांनी उपस्थित केला.

सदावर्ते यांनी शिवसेना भवनातील छायाचित्रांच्या मांडणीचा मुद्दा उपस्थित करत राज ठाकरे आणि उद्धव ठाकरे यांना घेरण्याचा प्रयत्न केला. “शिवसेना भवनाच्या आत असलेला फोटो प्रोटोकॉलप्रमाणे आहे का? छत्रपती शिवाजी महाराज आणि बाळासाहेब ठाकरे यांचा फोटो एकत्र आहे,” असा सवाल त्यांनी केला.

इतकंच नाही तर सदावर्ते यांनी बाळासाहेब ठाकरे हे एका राजकीय पक्षाचे प्रमुख होते, तर छत्रपती शिवाजी महाराज हे महाराष्ट्राच्या आणि देशाच्या इतिहासातील महान व्यक्तिमत्त्व असल्याचं सांगत या दोघांची तुलना करण्यावर प्रश्नचिन्ह उपस्थित केलं.

“प्रबोधनकार ठाकरे यांना लोक मानतात; मात्र बाळासाहेब ठाकरे हे एका पक्षाचे प्रमुख होते. त्यांची बरोबरी नसताना त्यांचा फोटो शिवरायांच्या वर लावला जाऊ शकतो का?” असा सवाल त्यांनी केला.

राज ठाकरेंवर टीका करताना सदावर्ते यांनी “लोका सांगे ब्रह्मज्ञान…” असा टोलाही लगावला. तसेच, “राज ठाकरे, तुम्ही किती मिनिटांत, किती तासांत हे फोटो काढता?” असा सवाल करत त्यांनी थेट उद्धव ठाकरेंना लक्ष्य केलं.

“शिवसेना भवनात छत्रपती शिवाजी महाराजांच्या पुतळ्याच्या वर बाळासाहेब ठाकरे यांचा फोटो आहे. तो फोटो मोठा आहे. मग तो वर ठेवला जाऊ शकतो का? उद्धव ठाकरेंना सांगा, बाळासाहेबांचा तो फोटो काढायला,” अशी आक्रमक मागणी सदावर्ते यांनी केली.

याच मुद्द्यावर सदावर्ते यांनी आता १५ दिवसांचा अल्टिमेटम दिला आहे. शिवरायांचा अपमान सहन केला जाणार नसल्याचं सांगत, “जे लोक छत्रपती शिवाजी महाराजांना मानतात, त्यांना माझी विनंती आहे.

मी यांना १५ दिवसांची मुदत देतो. १५ दिवसांत हा फोटो काढला नाही, तर मी स्वतः न्यायालयात जाईन. गरज पडल्यास उपोषण करेन; पण शिवरायांचा अपमान सहन करणार नाही,” असा इशारा त्यांनी दिला.