संदिप गिरीगोसावी

कोल्हापूर  : महाराष्ट्र विधान परिषदेच्या पुणे विभागीय पदवीधर व शिक्षक मतदारसंघातील निवडणुकीसाठी उद्या शुक्रवारी मतदान होत असून निवडणूक प्रक्रिया नि:पक्ष, पारदर्शक व निर्भय वातावरणात पार पाडण्यासाठी निवडणुक यंत्रणा सज्ज आहे.

पदवीधर मतदार संघाच्या निवडणुकीत ४७ उमेदवार आणि शिक्षक मतदार संघासाठी ३० उमेदवार निवडणूक रिंगणात आहेत. या निवडणुकीसाठी दोन्ही मतदारसंघात मिळून विभागातील पाच जिल्ह्यांत १ हजार ५१ मतदान केंद्रांची व्यवस्था करण्यात आली असून ४ लाख ४९ हजार ९५९ मतदार आपला मतदानाचा पवित्र हक्क बजावणार आहेत.

पदवीधर मतदारसंघाच्या निवडणुकीसाठी मतदान केंद्रे व मतदारांची संख्या

पदवीधर मतदारसंघाच्या निवडणुकीसाठी एकूण मतदार संख्या ३ लाख ८८ हजार १९ असून मतदान केंद्रे ७४१ आहेत. जिल्हानिहाय मतदान केंद्रे व मतदारांची संख्या अनुक्रमे पुढील प्रमाणे आहे.

• पुणे – १६० मतदान केंद्रे (८८ हजार २०२ मतदार)
• सातारा- ९३ (४७ हजार ४६३),
• सोलापूर – ११७ (४९ हजार ७२
• सांगली- १५९ (८८ हजार ७०)
• कोल्हापूर जिल्ह्यात २१२ मतदान केंद्रे १ लाख १४ हजार ५६२ मतदारांची संख्या आहे.

शिक्षक मतदारसंघ निवडणुकीसाठी मतदान केंद्रे आणि मतदारांची संख्या 

शिक्षक मतदारसंघ निवडणुकीसाठी एकुण मतदान केंद्रे ३१० असून मतदार संख्या ६१ हजार ९४० आहे. जिल्हानिहाय मतदान केंद्रे व मतदारांची संख्या अनुक्रमे पुढील प्रमाणे आहे.

• पुणे – ७२ मतदान केंद्रे (१६ हजार ८२२ मतदार)
• सोलापूर – ७६ (१५ हजार ३०३)
• सातारा- ४४ (९ हजार ४५४)
• सांगली- ४८ (८ हजार ६२)
• कोल्हापूर जिल्ह्यात ७० मतदान केंद्रे व १२ हजार २९९ मतदारांची संख्या आहे.

शिक्षक व पदवीधर मतदार संघांसाठी एका मतदान केंद्रावर एक केंद्राध्यक्ष, तीन मतदान अधिकारी आणि एक शिपाई याप्रमाणे ५ अधिकारी- कर्मचाऱ्यांची नियुक्ती करण्यात आली आहे. राखीव कर्मचाऱ्यांसह सुमारे ७ हजार ५०० मतदान कर्मचारी नियुक्त करण्यात आले आहेत.

मतदान केंद्रावरील सोय

मतदान केंद्रावर रँप, पिण्याचे पाणी, वीज व प्रकाशयोजना, स्त्री-पुरुषासाठी स्वतंत्र स्वच्छतागृह, सावली, वैद्यकीय किट, मदत कक्ष, स्वयंसेवक, दिशादर्शक फलक व रांग व्यवस्थापनाची सोय करण्यात आली आहे. तसेच मतदार मदत केंद्राची सुविधाही उपलब्ध करुन देण्यात आली आहे. निवडणूक प्रक्रिया नि:पक्ष, पारदर्शक व निर्भय वातावरणात पार पाडण्यासाठी पुरेसा पोलीस बंदोबस्त तैनात करण्यात आला आहे.

आचारसंहितेच्‍या अंमलबजावणीसाठी पाचही जिल्ह्यांत नोडल अधिकारी म्हणून निवासी उपजिल्हाधिकाऱ्यांची नेमणूक करण्यात आली असून एकूण ३० भरारी पथके (एफएसटी) नियुक्त करण्यात आली आहेत. तसेच विभागीय आयुक्त कार्यालय, पुणे येथे २४ तास कार्यरत तक्रार निवारण नियंत्रण कक्ष सुरू आहे. प्रत्येक तक्रारीची नोंद वेळ व कारवाईसह ठेवली जात असून तक्रारींचे तत्काळ सनियंत्रण होत आहे.

२७ ऑक्टोबर रोजी मतमोजणी 

मतदानानंतर मतमोजणी मंगळवार दि. २७ ऑक्टोबर रोजी श्री शिवछत्रपती क्रीडा संकुल, बालेवाडी येथील बॅडमिंटन हॉलमध्ये होणार आहे. यामध्ये शिक्षक मतदार संघाच्या मतमोजणीसाठी तीन रांगांमध्ये ४२ टेबल तर प्रत्येक टेबलवर एक मतमोजणी पर्यवेक्षक, दोन मतमोजणी सहायक व एक शिपाई.

तर पद‌वीधर मतदार संघाच्या मतमोजणीसाठी पाच रांगांमध्ये १०० टेबल आणि प्रत्येक टेबलवर एक मतमोजणी पर्यवेक्षक, दोन मतमोजणी सहायक व एका शिपायाची नियुक्ती करण्यात आली आहे.

दरम्यान, पाचही जिल्हयातील सर्व मतदारांनी आपला मतदानाचा पवित्र हक्क बजावावा, असे आवाहन निवडणूक निर्णय अधिकारी तथा विभागीय आयुक्त पुणे, शीतल तेली-उगले यांच्याकडून करण्यात आले आहे.

Hair Care Tips: रात्री झोपताना केसांची काळजी घेताय का? ‘या’ ३ सोप्या टिप्समुळे केसांचा गुंता आणि तुटण्याचा त्रास होईल कमी!