श्रीरामपूर, (प्रतिनिधी)- राजूर येथील प्रकल्प जिल्ह्यातील इतर आदिवासींच्या दृष्टीने गैरसोईचा आहे. या कार्यालयात जाण्या-येण्यास पैसा व वेळ खर्च होतो.

त्यामुळे श्रीरामपूर येथे उपप्रकल्प कार्यालय सुरू करावे, अशी मागणी आमदार लहू कानडे यांनी सरकारकडे केली. अतिक्रमणे उठविण्यासाठी येणाऱ्या अधिकाऱ्यांवर दांडा काढावा, मी तुमच्या पाठीशी राहील, अशी ग्वाही त्यांनी दिली.

श्रीरामपूर-पुणतांबे रस्त्यावरील गोंधवणी येथील डावखर मंगल कार्यालयात एकलव्य भिल्ल समाज संघटनेच्यावतीने आयोजित केलेल्या आदिवासी एल्गार महासभेच्या अध्यक्षपदावरून आ. कानडे बोलत होते.

श्रीरामपूर तालुका काँग्रेसचे अध्यक्ष अरुण पाटील नाईक, माजी नगरसेवक अशोक कानडे, सतीश बोर्डे, सरपंच अशोक भोसले, सागर मुठे, संभाजी ब्रिगेडचे जिल्हाध्यक्ष शिवाजी पवार, दीपक निंबाळकर, सुदाम पटारे, युनूस पटेल, सरपंच नंदा अहिरे यावेळी व्यासपीठावर होते.

प्रारंभी विधानसभा अधिवेशनामध्ये पारधी विकास आराखड्याप्रमाणे भिल्ल विकास आराखडा मंजूर करावा, या विषयावर आवाज उठवून त्यास मान्यता देण्याची मागणी केल्याबद्दल आ. कानडे यांचा सन्मानचिन्ह, प्रशस्तीपत्र व पुष्पहार घालून सन्मान करण्यात आला.

गोदावरी नदीत बुडणाऱ्या तिघांना आपल्या साडीच्या साह्याने वाचविणाऱ्या कोपरगाव येथील ताराबाई पवार यांचा आ. कानडे यांच्या हस्ते सत्कार करण्यात आला.

आ. कानडे म्हणाले, शासकीय जागेत अतिक्रमण करून राहणाऱ्या आदिवासींचे अतिक्रमणे नियमानुकूल करावीत, असा निर्णय शासनाने घेतला असला तरी त्याची अंमलबजावणी होत नाही. या प्रश्नासाठी आपली लढाई सुरू आहे. अशी अतिक्रमणे उठविण्यासाठी येणाऱ्या अधिकाऱ्यांवर दांडा काढावा, मी तुमच्या पाठीशी राहील.

सरकारने आदिवासींसाठी जे प्रकल्प केले तेथे सर्व निधी दिला जातो. राजूर येथे आदिवासी प्रकल्प असून त्यांना 85 टक्के निधी मिळतो तर इतरत्र आदिवासींची संख्या जास्त असताना त्यांना मात्र 15 टक्के निधी मिळतो.

सर्व आदिवासींना समान निधीचे वाटप व्हावे, असा आग्रह आपण शासनाकडे धरला, पारधी विकास आराखड्याप्रमाणे आदिवासी विकास आराखडा मंजूर करावा, यासाठी आपण विधानमंडळात प्रश्न उपस्थित करून आवाज उठविला, पुढील काळात यासाठी लढा उभारावा लागेल, असे ते म्हणाले.

आदिवासींसाठी असलेल्या तसेच राजुर प्रकल्प अंतर्गत आश्रम शाळा सुरू करण्यात आल्या आहेत, त्यातील काही आश्रम शाळा बंद असून त्यांचे लेखाशीर्ष मात्र बंद झालेले नाही.

त्यामुळे त्यापैकी श्रीरामपूर व देवळाली प्रवरा येथे आश्रम शाळा सुरू कराव्यात, यासाठी आपण शासन दरबारी पाठपुरावा करणार असल्याचे त्यांनी सांगितले. रंगनाथ आहेर व हर्षदा आहेर यांनी सूत्रसंचालन केले.

अरुण पाटील नाईक यांनी आभार मानले. कार्यक्रमास मोठ्या संख्येने आदिवासी महिला व पुरुष उपस्थित होते. महिलांची संख्या लक्षनीय होती. मंगल कार्यालय गर्दीने भरले होते. त्यामुळे बाहेरही अनेक आदिवासी बांधव व महिला भगिनी उपस्थित होत्या.