प्रभात वृत्तसेवा
पुणे – दिवाळी सण साजरा करून शहरात पतरणाऱ्या प्रवाशांची संख्या मोठी असल्याने अशा प्रवाशांना सुखकर आणि सुरक्षित प्रवास करता यावा, कोणतीही अनुचीत घटना घडू नये यासाठी चालक-वाहकांची ब्रेथ अ‍ॅनालायझरद्वारे तपासणी केली जात असल्याचे पुणे एसटी प्रशासनाकडून सांगण्यात आले.एसटी महामंडळाच्या ताफ्यातील सर्व बसचालकांची प्रत्येक फेरीपूर्वी अल्कोहोल तपासणी करण्याचा निर्णय महामंडळाने घेतला आहे.

एसटी महामंडळाच्या ताफ्यात खासगी ठेकेदारांच्या शिवशाही, शिवनेरी बसे भाडेतत्त्वावर चालविल्या जातात. या गाड्यांना चालक पुरवण्याचे कामही ठेकेदारच करतात. यावर महामंडळाने अशा सर्व चालकांची तपासणी करण्याचा निर्णय घेतला आहे. गतवर्षी एका शिवनेरी बसवरील चालक मद्यपान करून बस चालवत असल्याचा प्रकार समोर आला. हा चालक ठेकेदाराकडील होता. त्यानंतर गतवर्षी महामंडळाच्या कारभारावर प्रचंड टीका झाली होती.

या पार्श्वभूमीवर दिवाळीमध्ये चालक-वाहक ड्यूटीवर आल्यावर मद्यपानाची ब्रेथ अ‍ॅनालायझरद्वारे तपासणी करण्यात येत आहे. पुणे विभागातील स्वारगेट आणि शिवाजीनगर आगारासह जिल्ह्यातील सर्व आगारांतील चालक-वाहकांची अल्कोहोल तपासणी करण्यात येत आहे, चालक-वाहक गाडीत बसण्याअधीच अशी तपासणी केली जाते, असेही प्रशासनाने स्पष्ट केले.