Srushti Jadhav : भारती विद्यापीठाच्या शारीरिक शिक्षण महाविद्यालयाच्या बी.पी.ई.एस. द्वितीय वर्षाची विद्यार्थिनी सृष्टी जाधव (Srushti Jadhav) हिची ‘सीनियर सॅटेलाइट फेन्सिंग वर्ल्डकप’ स्पर्धेसाठी निवड झाली आहे. ही प्रतिष्ठेची आंतरराष्ट्रीय स्पर्धा बँकॉक, थायलंड येथे होणार असून, सृष्टी भारताचे प्रतिनिधित्व करणार आहे.

सृष्टी (Srushti Jadhav) गेल्या पाच वर्षांपासून फेन्सिंगचा नियमित सराव करीत असून, सातत्यपूर्ण मेहनत, चिकाटी आणि उत्कृष्ट कामगिरी च्या जोरावर तिने आंतरराष्ट्रीय स्तरावर मजल मारली आहे. यापूर्वी तिने वेस्टेंड ईपी ग्रँडप्रिक्स (वर्ल्डकप), बुडापेस्ट, हंगेरी (२०२५) येथे सहभाग घेतला आहे.

तसेच सिनियर नॅशनल, केरळ (२०२५) स्पर्धेत कांस्यपदक, ज्युनिअर नॅशनल, हरियाणा येथे कांस्यपदक मिळविले असून, नॅशनल गेम्स, उत्तराखंड आणि ज्युनिअर नॅशनल, ओडिशा स्पर्धेतही सहभाग नोंदविला आहे.

सृष्टीच्या या निवडीमुळे भारती विद्यापीठाच्या शारीरिक शिक्षण महाविद्यालयासह संपूर्ण भारती विद्यापीठाच्या शिरपेचात मानाचा तुरा रोवला गेला आहे. तिच्या यशाबद्दल महाविद्यालयाचे प्राचार्य डॉ. नेताजी जाधव, भारती विद्यापीठाचे क्रीडा संचालक डॉ. स्वप्नील विधाते तसेच शिक्षकांनी तिचे अभिनंदन करून आंतरराष्ट्रीय स्पर्धेसाठी शुभेच्छा दिल्या.

सृष्टीला (Srushti Jadhav) नॅशनल इन्स्टिट्यूट ऑफ स्पोर्ट्सचे प्रशिक्षक प्रफुल्ल जगताप यांचे मार्गदर्शन लाभत असून, आगामी वर्ल्ड कप मध्ये ती दमदार कामगिरी करेल, असा विश्वास व्यक्त करण्यात आला आहे.