SPPU News – विविध प्रवेश शुल्काबाबतची माहिती महाविद्यालयाच्या दर्शनी भागात, संकेतस्थळावर, माहिती पुस्तिकेत नमूद करणे बंधनकारक आहे. विद्यार्थ्यांकडून बेकायदा शुल्क आकारल्यास महाविद्यालयांवर कठोर कारवाईचा इशारा सावित्रीबाई फुले पुणे विद्यापीठाने दिला आहे. उच्च शिक्षण संचालक डॉ.शैलेंद्र देवळाणकर यांनी विद्यार्थ्यांच्या शुल्काबाबतच्या सूचनांचे तंतोतंत पालन करण्याचा आदेश सर्व विभागीय उच्च शिक्षण सहसंचालक, विद्यापीठांच्या कुलसचिवांना बजाविले आहेत.

त्यानुसार सावित्रीबाई फुले पुणे विद्यापीठाच्या शैक्षणिक प्रवेश विभागाचे उपकुलसचिव डॉ.मुंजाजी रासवे यांनी महाविद्यालय प्राचार्यांना आदेश जारी केले आहेत. बारावीच्या परीक्षांचा निकाल जाहीर झाला असून सर्व महाविद्यालयांमध्ये पदवी प्रवेश प्रक्रिया सुरू झाली आहे. विद्यार्थ्यांनी महाविद्यालयांमध्ये प्रवेश घेताना विद्यापीठ, शुल्क नियामक प्राधिकरण यांच्या नियमानुसार व मान्यतेनुसार प्रवेश शुल्क म्हणजेच ट्युशन फी,

डेव्हलपमेंट फी आणि इतर शुल्काबाबतची माहिती महाविद्यालयाच्या दर्शनी भागात सूचना फलकावर लावणे अनिवार्य केले आहे. प्रवेश शुल्काबाबतची संपूर्ण माहिती महाविद्यालयाच्या माहिती पुस्तिकात समाविष्ठ करण्याचेही बंधन घातले आहे. विद्यार्थ्यांकडून नियमबाह्य शुल्क घेतल्याचे निदर्शनास आल्यास किंवा तक्रार आल्यास महाविद्यालयावर रितसर कारवाई करण्यात येणार आहे.

प्रवेशापूर्वी विद्यार्थ्यांना शुल्काची सविस्तर माहिती करून देणे ही जबाबदारी महाविद्यालयाची आहे. अभ्याक्रमनिहाय शुल्क महाविद्यालयाच्या संकेतस्थळावरही प्रदर्शित करावे. यासंदर्भात तक्रार उद्भवणार नाही याची दक्षता महाविद्यालयांना घ्यावी, अशा सूचनाही विद्यापीठाने दिल्या आहेत.