SPPU News – सावित्रीबाई फुले पुणे विद्यापीठाने आदेश देऊनही महाविद्यालयांनी प्राचार्य, संचालक, प्राध्यापकाची रिक्त पदे भरण्याची कार्यवाही केलेली नाही. त्यामुळे या संबंधित महाविद्यालयांवर कारवाई करावी, अशी मागणी विविध विद्यार्थी संघटनांनी विद्यापीठाचे कुलगुरू डॉ. सुरेश गोसावी यांच्याकडे केली आहे. विद्यापीठ कायद्यातील तरतुदीनुसार संलग्न महाविद्यालयांनी प्राचार्य प्राध्यापक, संचालक, तसेच शिक्षकेतर कर्मचाऱ्यांची संख्या विद्यापीठ आणि राज्य शासनाने निश्चित केल्याप्रमाणे असणे आवश्यक आहे.

महाविद्यालयांनी रिक्त पदे भरण्याची कार्यवाही करण्याबाबत विद्यापीठाकडून संलग्न महाविद्यालयांना वारंवार सूचित केले असूनही अनेक महाविद्यालयांनी रिक्त पदे भरण्याची कार्यवाही सुरू केली नसल्याने विद्यार्थी दर्जेदार शिक्षणापासून वंचित राहात आहेत.अनेक संलग्न महाविद्यालयांनी निर्देशांचे पालन न करता प्रथम वर्षाचे प्रवेश उरकून घेतले आहेत.

काही महाविद्यालयांनी तात्पुरत्या स्वरूपात प्राध्यापकांची अल्प मानधनावर नियुक्ती करून त्यांची आर्थिक पिळवणूक सुरू केली असून, अशा महाविद्यालयांवर विद्यापीठाने तात्काळ कडक कारवाई करावी, यांसह इतर मागण्यांसाठी विविध राजकीय पक्ष आणि विद्यार्थी संघटनांच्या शिष्टमंडळाने कुलगुरू डॉ. सुरेश गोसावी यांना निवेदन दिले. वस्तुस्थितीचे गांभीर्य लक्षात घेऊन आठ दिवसांत सदर आदेश न पाळणाऱ्या महाविद्यालयांवर कडक कारवाई केली जाईल,

असे आश्वासन कुलगुरूंनी शिष्टमंडळाला दिले. शिष्टमंडळात विद्यार्थी विकास मंचचे ॲड. सुरेश खुरपे, अनिल शेवरे, वंचित बहुजन आघाडीचे अतुल झोडगे, महाराष्ट्र प्रदेश काँग्रेस लीगल सेलचे ॲड. फैयाज शेख, अखिल भारतीय विद्यार्थी सेनेचे उल्हास अग्निहोत्री, राष्ट्रवादी विद्यार्थी काँग्रेसचे अमरजीत पबमे, रोहन काळे आदींचा समावेश होता.