Spider-Man-Brand New Day : टॉम हॉलंड अभिनीत ‘स्पायडर-मॅन: ब्रँड न्यू डे’ हा चित्रपट सध्या भारतीय बॉक्स ऑफिसवर धडाकेबाज कामगिरी करत असून, रोज नवे विक्रम आपल्या नावावर करत आहे. भारतात हा चित्रपट ३० जुलै रोजी प्रदर्शित झाला असून, प्रदर्शनानंतर अवघ्या काही दिवसांत या चित्रपटाने प्रेक्षकांची मोठी पसंती मिळवली आहे.

देशभरातील चित्रपटगृहांमध्ये या चित्रपटासाठी प्रचंड गर्दी होत असून, सुमारे १७ हजार शो आयोजित करण्यात आले आहेत. या शोमध्ये सरासरी ७० टक्के प्रेक्षक उपस्थिती नोंदवली जात आहे. मार्व्हल सिनेमॅटिक युनिव्हर्स (MCU) मधील या चित्रपटाने भारतात मिळवलेले यश अनेकांसाठी आश्चर्यकारक ठरत आहे.

‘स्पायडर-मॅन ४’ने पहिल्याच दिवशी MCU मधील सर्वात मोठ्या चित्रपटांपैकी एक असलेल्या ‘अ‍ॅव्हेंजर्स: एंडगेम’चा ओपनिंग कमाईचा विक्रम मोडला आहे. भारतीय बॉक्स ऑफिसवर चित्रपटाने अंदाजे ६० कोटी रुपयांची निव्वळ कमाई करत हॉलीवूड चित्रपटांसाठी नवा विक्रम प्रस्थापित केला आहे. दुसऱ्या दिवशी कमाईत किंचित घट झाली असली तरी, दोन दिवसांत चित्रपटाने १०० कोटी रुपयांहून अधिक गल्ला जमवला.

दरम्यान, तिसऱ्या दिवशी चित्रपटाच्या कमाईत आणखी मोठी वाढ झाली. सॅकनिल्कच्या अहवालानुसार, शनिवारी चित्रपटाच्या कमाईत ३५ टक्क्यांची वाढ नोंदवली गेली आणि चित्रपटाने ६६.७५ कोटी रुपयांची कमाई केली. यामुळे ‘स्पायडर-मॅन: ब्रँड न्यू डे’ हा भारतीय बॉक्स ऑफिसवर सर्वात वेगाने १५० कोटी रुपयांचा टप्पा गाठणारा चित्रपट ठरला आहे.

चित्रपटाची सध्याची घोडदौड पाहता पहिल्या आठवड्याअखेर तो ‘स्पायडर-मॅन: नो वे होम’च्या कमाईचाही विक्रम मागे टाकण्याची शक्यता व्यक्त केली जात आहे. आता रविवारी चित्रपटाची कमाई किती वाढते आणि आणखी कोणते विक्रम मोडले जातात, याकडे सर्वांचे लक्ष लागले आहे.

‘भाई तेरा स्टार है’ ला मोठा फटका

ज्या दिवशी ‘स्पायडर-मॅन: ब्रँड न्यू डे’हा चित्रपट प्रदर्शित झाला होता. त्याच दिवशी अभिनेता राघव जुयाल याची मुख्य भूमिका असलेला ‘भाई तेरा स्टार है’ चित्रपट प्रदर्शित झाला होता. या चित्रपटाला मोठा फटका बसला आहे. हा चित्रपट बॉक्स ऑफिसवर अपेक्षित प्रतिसाद मिळवण्यात अपयशी ठरला आहे. प्रदर्शनानंतर या चित्रपटाने केवळ २५ ते ६० लाख रुपयांच्या दरम्यान कमाई केली आहे.

Pankaja Munde : ‘विकासाचे फ्रेंड..’, माफ करण्याचा मोठेपणा असल्याचे म्हणत पंकजा मुंडेंकडून पंतप्रधान मोदींचे कौतुक