नवी दिल्ली : आत्महत्या केलेले आयपीएस अधिकारी वाय. पुरण कुमार यांच्या पत्नी अमनीत यांना काँग्रेस नेत्या सोनिया गांधी यांनी पत्र लिहिले आहे. न्यायाच्या मार्गावर आपण आणि देशभरातील लाखो लोक तुमच्यासोबत आहेत अशी ग्वाही या पत्रात देण्यात आली आहे. सोनिया गांधींनी आपल्या पत्रात म्हटले आहे की, तुमचे पती आणि वरिष्ठ आयपीएस अधिकारी वाय. पुरण कुमार यांच्या दुःखद निधनाची बातमी धक्कादायक आणि अत्यंत दुःखद आहे. या कठीण काळात तुम्हाला आणि तुमच्या संपूर्ण कुटुंबाला माझ्या मनःपूर्वक संवेदना. वाय. पुरण कुमार यांचे निधन आपल्याला आठवण करून देते की आजही सत्तेत असलेल्यांचा पूर्वग्रहदूषित आणि पक्षपाती दृष्टिकोन सर्वात वरिष्ठ अधिकाऱ्यांनाही सामाजिक न्यायापासून वंचित ठेवतो. मी आणि देशभरातील लाखो लोक न्यायाच्या या मार्गावर तुमच्यासोबत उभे आहोत. देव तुम्हाला या कठीण परिस्थितीत संयम, धैर्य आणि शक्ती देवो. एसआयटी स्थापन शुक्रवारी, चंदीगड पोलिसांनी कथित आत्महत्या प्रकरणाची चौकशी करण्यासाठी सहा सदस्यीय विशेष तपास पथक (एसआयटी) स्थापन केले. तथापि, कुमार यां च्या कुटुंबाने अद्याप शवविच्छेदनाची परवानगी दिलेली नाही, तर त्यांच्या पत्नीने एफआयआरमधील अपूर्ण माहितीवर प्रश्नचिन्ह उपस्थित केले आहे. कुमार यांना नुकतेच रोहतकमधील सुनारिया येथील पोलिस प्रशिक्षण केंद्राचे (पीटीसी) महानिरीक्षक म्हणून नियुक्त करण्यात आले होते. त्यांनी एक सुसाईड नोट सोडल्याचे वृत्त आहे ज्यामध्ये त्यांनी वरिष्ठ अधिकाऱ्यांची नावे दिली आहेत आणि गेल्या काही वर्षांत त्यांना झालेल्या मानसिक छळ आणि अपमानाची माहिती दिली आहे. ८ पानांची सुसाईड नोट आठ पानांच्या नोटमध्ये, कुमार यांनी हरियाणाचे पोलीस महासंचालक शत्रुघ्न कपूर आणि रोहतकचे पोलिस अधीक्षक नरेंद्र बिजर्निया यांच्यासह आठ वरिष्ठ आयपीएस अधिकाऱ्यांवर त्यांचा छळ आणि बदनामी केल्याचा आरोप केला आहे. २००१ च्या बॅचचे आयपीएस अधिकारी कुमार यांनी मंगळवारी चंदीगडच्या सेक्टर ११ येथील त्यांच्या निवासस्थानी स्वतःवर गोळी झाडून आत्महत्या केल्याचा आरोप आहे. त्यांची पत्नी, एक वरिष्ठ आयएएस अधिकारी असून हरियाणा सरकारमध्ये आयुक्त आणि सचिव आहेत.
