Sonal Dinusha Century : भारताविरुद्ध पहिल्यांदाच असं घडलं! सोनल दिनुशा ‘हा’ खास विश्वविक्रम करणारा ठरला जगातील पहिलाच खेळाडू
Sonal Dinusha Century : श्रीलंकेचा फलंदाज सोनल दिनुशाने कोलंबो कसोटीत आपले दुसरे शतक झळकावून इतिहास रचला. भारताविरुद्धच्या दोन सामन्यांच्या कसोटी मालिकेतील सोनलचे हे तिसरे शतक आहे.
Sonal Dinusha Historic Twin Centuries Colombo Test IND vs SL : श्रीलंका क्रिकेट संघाचा युवा स्टार फलंदाज सोनल दिनुषाने (Sonal Dinusha) कोलंबो कसोटीत आपल्या अविश्वसनीय फलंदाजीच्या जोरावर जागतिक कसोटी क्रिकेटच्या इतिहासात नवी सुवर्णपाने लिहिली आहेत. भारताच्या बलाढ्य गोलंदाजीसमोर अप्रतिम संयम दाखवत त्याने दुसऱ्या कसोटीच्या दोन्ही डावांत सलग शतके ठोकण्याचा पराक्रम केला. भारताविरुद्धच्या अवघ्या दोन कसोटी सामन्यांच्या मालिकेत तब्बल ३ शतके झळकावणारा दिनुषा हा कसोटी इतिहासातील जगातील पहिलाच फलंदाज ठरला आहे.
१९६ चेंडूंत पूर्ण केले शतक; मालिकेत ३८७ धावांचा डोंगर –
सामन्याच्या पाचव्या आणि अखेरच्या दिवशी चहापानापर्यंत ९८ धावांवर नाबाद राहिलेल्या दिनुषाने तिसऱ्या सत्रात मैदानात उतरताच २ धावा काढून आपले शतक पूर्ण केले. त्याने १९६ चेंडूंत हे शतक ठोकले. गॉल येथील पहिल्या कसोटीतील पहिल्या डावात १०० आणि दुसऱ्या डावात ८४ धावा करणाऱ्या दिनुषाने कोलंबो कसोटीच्या पहिल्या डावात १०३ आणि आता दुसऱ्या डावात नाबाद शतक झळकावले. या २ कसोटी सामन्यांच्या ४ डावांत त्याने ३८७ धावा कुटत मालिकेत सर्वाधिक धावा करण्याचा मान मिळवला.
६७ वर्षांनंतर घडला चमत्कार; दिग्गजांच्या क्लबमध्ये मारली एन्ट्री!
Sonal Dinusha’s scores in this series:
100.
84.
103.
101*.ONE OF THE FINEST PERFORMANCES BY A 25 YEAR OLD AGAINST INDIA. pic.twitter.com/CVBk8VRMdp
— Mufaddal Vohra (@mufaddal_vohra) August 27, 2026
भारताविरुद्ध आपल्या सुरुवातीच्या पहिल्या चारही कसोटी डावांत ५० हून अधिक धावा करणारा सोनल दिनुषा हा जगातील केवळ पाचवा फलंदाज ठरला आहे. तब्बल ६७ वर्षांनंतर कसोटी क्रिकेटमध्ये असा अद्भूत विक्रम पाहायला मिळाला आहे. यापूर्वी १९५९ मध्ये इंग्लंडच्या केन बॅरिंग्टन यांनी ही कामगिरी केली होती. त्यांच्या आधी डग्लस जार्डिन (१९३२-३४), एव्हर्टन वीक्स (१९४८) आणि क्लाइड वॉलकॉट (१९४८) यांनी अशी कामगिरी केली होती.
२९ वर्षांनंतर दोन्ही डावांत शतके; अरविंद डी सिल्वांच्या पंक्तीत स्थान!
भारताविरुद्ध एकाच कसोटी सामन्याच्या दोन्ही डावांत शतके झळकावणारा दिनुषा हा तिसराच श्रीलंकन फलंदाज ठरला आहे. तब्बल २९ वर्षांनंतर कोणत्याही श्रीलंकन फलंदाजाला हा पराक्रम करता आला आहे. यापूर्वी १९८२ मध्ये दुलीप मेंडिस (१०५ आणि १०५) आणि १९९७ मध्ये अरविंद डी सिल्वा (१४६ आणि १२०) यांनी भारताविरुद्ध दोन्ही डावांत शतके ठोकली होती. सोनल दिनुषाच्या या ऐतिहासिक झुंजीमुळे श्रीलंकेने कोलंबो कसोटीत भारतासमोर जबरदस्त लढा दिला आहे.
