SL vs NZ 1st Test (Kamindu Mendis) : श्रीलंका आणि न्यूझीलंड यांच्यात खेळल्या जात असलेल्या 2 सामन्यांच्या कसोटी मालिकेतील पहिला सामना गॅले मैदानावर खेळला जात आहे, ज्यामध्ये यजमान संघाने नाणेफेक जिंकून प्रथम फलंदाजी करण्याचा निर्णय घेतला. पहिल्या दिवसाचा खेळ संपला तेव्हा श्रीलंकेच्या संघाने पहिल्या डावात 7 गडी गमावून 302 धावा केल्या होत्या.

गॅले कसोटी सामन्याच्या पहिल्या दिवसाचा हिरो होता श्रीलंका संघाचा 25 वर्षीय डावखुरा फलंदाज कामिंडू मेंडिस, ज्याने आपल्या कारकिर्दीतील 11व्या कसोटी डावात चौथे शतक झळकावले. कामिंडूने 173 चेंडूंचा सामना करत 11 चौकारांच्या मदतीने 114 धावा केल्या. कसोटी क्रिकेटमध्ये पदार्पण केल्यापासून, कामिंडू मेंडिसने सतत आपल्या बॅटने नवीन विक्रम रचण्याचे काम केले आहे आणि आता त्याने आजच्या  कसोटी शतकासह डॉन ब्रॅडमनच्या विशेष विक्रमाची बरोबरी केली आहे.

कामिंडू कसोटी क्रिकेटमध्ये श्रीलंकेचा नवा हिरो ठरत आहे. कामिंडू त्याचा केवळ सातवा कसोटी सामना खेळत असून त्याने 11 डावातच चार शतके झळकावली आहेत. या सामन्यापूर्वी कामिंडूने मँचेस्टरच्या ओल्ड ट्रॅफर्ड मैदानावर इंग्लंडविरुद्ध शतक झळकावले होते. लॉर्ड्स आणि ओव्हल येथे त्याने अर्धशतके झळकावली होती.

सर्वात कमी डावात 4 शतके झळकावणारे फलंदाज…

जॉर्ज हॅडली – 8 डाव
सुनील गावस्कर – 8 डाव
विनोद कांबळी – 8 डाव
हर्बर्ट सटक्लिफ – 9 डाव
एव्हर्टन वीक्स – 9 डाव
हॅरी ब्रूक – 9 डाव
ॲलन मेलविले – 10 डाव
नील हार्वे – 10 डाव
पीटर पॅर्फिट – 10 डाव
डॉन ब्रॅडमन – 11 डाव
कामिंदू मेंडिस – 11 डाव

SL vs NZ 1st Test : कामिंडू मेंडिसची शतकी खेळी, न्यूझीलंडविरूध्दच्या कसोटीत पहिल्या दिवशी श्रीलंका मजबूत स्थितीत…

कमिंडू आता श्रीलंकेसाठी कसोटी क्रिकेटमधील सर्वात कमी डावात चार शतके झळकावणारा खेळाडू बनला आहे. याआधी हा विक्रम मायकेल वॅनडॉर्टच्या नावावर होता, ज्यांनी 21 डावांमध्ये ही कामगिरी केली होती. या शतकासह कामिंडूने डॉन ब्रॅडमनच्या विशेष विक्रमाची बरोबरी केली आहे, ज्यांनी कसोटीतील 11व्या डावात चौथे शतक झळकावले होते.