मुंबई : 2025 मध्ये म्युच्युअल फंड उद्योगात तेजी कायम राहिली. एसआयपीच्या माध्यमातून 14 लाख कोटी रुपयांचा निधी आल्यामुळे नोव्हेंबर अखेर म्युच्युअल फंडाच्या व्यवस्थापनाखाली मालमत्ता 81 लाख कोटी रुपयांवर गेले आहे. म्युच्युअल फंड नियंत्रक अॅक्फीचे मुख्य कार्यकारी अधिकारी वेंकट छलसानी यांनी सांगितले की आगामी, वर्षाबाबतही आम्ही आशावादी आहेत. सरलेल्या वर्षात परदेशी संस्थागत गुंतवणूकदारांनी(एफआयआय) रूपया कमकुवत झाल्यामुळे मोठ्या प्रमाणात गुंतवणूक काढून घेतली असताना सर्व सामान्य लोकांनी एसआयपीच्या माध्यमातून ही तूट भरून काढण्याचा प्रयत्न केल्यामुळे भारतातील शेअर आणि रोखे बाजारातील आशावाद कायम राहण्यास मदत झाली. परदेशी घडामोडी आणि कंपन्यांचे बाजार मूल्य या आधारावर आगामी काळात एसआयपीतून गुंतवणूक चालू राहील. सध्या तरी गुंतवणूकदारांचा लार्ज कॅप आणि हायब्रीड गुंतवणूक पद्धतीकडे ओढा आहे. ते म्हणाले की, यावर्षी एसआयपीच्या माध्यमातून 3.36 कोटी नवे गुंतवणूकदार आले. परिणामी म्युच्युअल फंडाच्या नियंत्रणाखालील मालमत्ता 2024 च्या 67 लाख कोटी रुपयावरून 21 टक्क्यांनी वाढून नोव्हेंबरअखेर 81 लाख कोटी रुपये इतकी झाली आहे. 2024 मध्ये मालमत्तेत 33% आणि 2023 मध्ये 27 टक्के वाढ झाली होती. त्यापेक्षा यावर्षी झालेली वाढ कमी असले तरी फारच निराशाजनक नाही. भारतीय म्युच्युअल फंड उद्योगात 49 कंपन्या असून सलग तेराव्या वर्षी म्युच्युअल फंडाच्या नियंत्रणाखालील मालमत्तेत वाढ झाली आहे. त्याचबरोबर यावर्षी शेअर संदर्भातील म्युच्युअल फंड योजनात 3.53 लाख कोटी रुपयांची गुंतवणूक झाली.
