Singapore Open 2024 : सिंगापूर ओपन बॅडमिंटन स्पर्धेच्या पहिल्या फेरीत सात्विकसाईराज रँकीरेड्डी आणि चिराग शेट्टी या जागतिक क्रमवारीत अव्वल स्थानी असलेल्या भारतीय पुरुष जोडीला मंगळवारी डेन्मार्कच्या डॅनियल लुंडगार्ड आणि मॅड्स वेस्टरगार्ड यांच्याविरुद्ध मोठया उलटफेरला सामोरं जावं लागलं.

या भारतीय जोडीला जागतिक क्रमवारीत 34व्या क्रमांकावर असलेल्या जोडीविरुद्ध 47 मिनिटे चाललेल्या सामन्यात 20-22, 18-21 असा पराभव स्वीकारावा लागला. पॅरिस ऑलिम्पिकमध्ये सुवर्णपदक जिंकण्याच्या प्रबळ दावेदारांपैकी एक असलेल्या सात्विक आणि चिराग या जोडीने या महिन्याच्या सुरुवातीला थायलंड ओपन सुपर 500 चे विजेतेपद पटकावले होते.

फ्रेंच आणि थायलंड ओपन जिंकल्यानंतर वर्षातील तिसरे विजेतेपद मिळवण्याच्या प्रयत्नात स्पर्धेत उतरलेल्या चिराग-सात्विक यांनी संथ सुरुवात केली आणि ते 4-9 असे पिछाडीवर होते. मात्र, यानंतर भारतीय बॅडमिंटनपटूंनी काही गुण मिळवण्यात यश मिळवले, परंतु अतितटीच्या गेममध्ये त्यांना पराभवाचा सामना करावा लागला. दुसऱ्या गेममध्येही दोन्ही संघ 16-16 असे बरोबरीत होते, पण शेवटी लुंडगार्ड आणि वेस्टरगार्ड यांनी सामना जिंकून पुढील फेरीत आपले स्थान निश्चित केले. दुसऱ्या फेरीत, डेन्मार्क खेळाडूंचा सामना पीपल्स रिपब्लिक ऑफ चायनाच्या ‘हे जी टिंग’ आणि ‘रेन जियांग यू’ यांच्याशी होईल, ज्यांनी एकत्रितपणे थायलंड मास्टर्स जिंकले आणि या वर्षाच्या सुरुवातीला जर्मन ओपनची अंतिम फेरी गाठली होती.

French Open 2024 : लाल मातीचा सम्राट नदालवर पहिल्याच फेरीत पराभूत होण्याची नामुष्की…

या जोडीशिवाय, इतर भारतीय खेळाडूंनाही सुपर 750 स्तरावरील सिंगापूर ओपन स्पर्धेच्या पहिल्या फेरीत निराशेचा सामना करावा लागला. आकर्षी कश्यप आणि प्रियांशू राजावत यांनाही आपापल्या श्रेणीत पहिली फेरी पार करता आली नाही.
महिला एकेरीत 41व्या मानांकित आकार्शीला थायलंडच्या पोर्नपिचा चोकेवोंगकडून 7-21, 15-21, तर पुरुष एकेरीत 42व्या क्रमांकाच्या राजावतला हाँगकाँगच्या ली चेउक य्यू कडून 21-13, 19-21 असा पराभव पत्करावा लागला.