Simhastha Kumbh Mela – आगामी सिंहस्थ गिरीश महाजन यांच्या माध्यमातून भाजपने हायजॅक केल्यामुळे शिवसेनेचे पक्षप्रमुख तथा उपमुख्यमंत्री एकनाथ शिंदे आणि राष्ट्रवादीचे अन्न व नागरी पुरवठा मंत्री छगन भुजबळ यांनीही आखाड्यात उडी घेतली आहे. भुजबळ यांनी आढावा बैठक बोलावली असून, शिंदे यांनी सिंहस्थ कामांची माहिती मागवली आहे. कामांवरून महायुतीत सुरू झालेला संघर्ष चर्चेचा विषय बनला आहे. सिंहस्थासाठी महापालिकेने १५ हजार कोटी, तर अन्य विभागांनी ९ हजार कोटी असा २४ हजार कोटींचा आराखडा तयार केला आहे. कुंभमेळा नियोजनाच्या सर्व बैठका मुख्यमंत्री देवेंद्र फडणवीस यांच्या उपस्थितीत झाल्या आहेत. फडणवीस यांनी जलसंपदामंत्री गिरीश महाजन यांच्यावर कुंभमेळा मंत्रिपदाची जबाबदारी सोपविली आहे. त्यामुळे सिंहस्थाची सूत्रे महाजन यांच्यामार्फत भाजपच्या हाती गेली आहे. जिल्ह्यात छगन भुजबळ, नरहरी झिरवाळ, माणिकराव कोकाटे आणि दादा भुसे असे चार मंत्री असताना त्यांनाही सिंहस्थाच्या बैठकांना बोलावले जात नाही. मंत्री आणि आमदारांना टाळून सिंहस्थाचे नियोजन केले जात असल्यामुळे महायुतीच्या नेत्यांमध्ये नाराजीनाट्य सुरू आहे. सिंहस्थाची कामेही भाजप मर्जीतल्या ठेकेदारांना वाटत आहे. भाजपकडून या नाराजीची दखल घेतली जात नसल्यामुळे शिवसेना आणि राष्ट्रवादीने थेट सिंहस्थाच्या आखाड्यात उतरून भाजपला शह देण्याचे प्रयत्न सुरू केले आहेत. मंत्री झाल्यापासून शांत असलेल्या भुजबळ यांनी सिंहस्थाची आढावा बैठक बोलावली आहे. तर, उपमुख्यमंत्री शिंदेंच्या नगरविकास विभागाने सिंहस्थाच्या कामांबाबत माहिती दिली जात नसल्याने नाराजी व्यक्त केली आहे. प्राधिकरणाची स्थापना, कायदा निर्मिती, प्राथमिक टप्प्यातील कामांना मंजुरी, वित्तीय तरतुदी यासंदर्भात फेरअहवाल सादर करण्याचे निर्देश दिले आहेत. भुजबळ-शिंदे ‘ॲक्टिव्ह’ झाल्याने प्रशासनाची कोंडी झाली आहे. सिंहस्थासाठी २४ हजार कोटींचा आराखडा शासनाला सादर केला आहे. त्यात सार्वजनिक बांधकाम विभागाला २,२७० कोटी आणि सिंहस्थ प्राधिकरणाला एक हजार कोटी रुपये मंजूर झाले आहेत. सिंहस्थ अवघ्या दीड वर्षावर येऊन ठेपला असताना सिंहस्थासाठी पुरेसा निधी मिळत नसल्याने शासकिय यंत्रणेत देखील अस्वस्थता आहे. तर, सिंहस्थ कामांमध्ये डावलले जात असल्याचे सांगत, राष्ट्रवादी आणि शिवसेनेने आता प्रशासनाच्या आडून भाजपला घेरण्याची रणनीती आखली आहे.
