जल्लोषपूर्ण वातावरणात श्रीमंत भाऊसाहेब रंगारी गणपतीचे आगमन
ज्येष्ठ बासरीवादक पं. हरिप्रसाद चौरसिया यांच्या हस्ते प्रतिष्ठापना

Shrimant Bhausaheb Rangari Ganpati: श्रीमंत भाऊसाहेब रंगारी सार्वजनिक गणपती ट्रस्टच्या गणेशाची जल्लोषात आणि भक्तिमय वातावरणात श्री गणेश सुवर्णधाम मंदिरात प्रतिष्ठापना करण्यात आली. जगप्रसिद्ध बासरीवादक पद्मविभूषण पंडित हरिप्रसाद चौरसिया यांच्या हस्ते दुपारी साडेबाराच्या सुमारास मंत्रोच्चारात बाप्पाची प्रतिष्ठापना करण्यात आली.

तत्पूर्वी, ढोल- ताशा पथकांच्या गजरात मोठ्या थाटामाटात मिरवणूक काढण्यात आली. मिरवणुकीदरम्यान इंद्रधनुष्यातील सप्तरंगाची उधळण आणि बुधवार चौकात सात थर रचून करण्यात आलेले बाप्पाचे जंगी स्वागत हे विशेष आकर्षण ठरले. या आगमन मिरवणुकीत हजारो भाविक सहभागी झाले होते.

दरवर्षीच्या परंपरेप्रमाणे सकाळी ट्रस्टचे उत्सव प्रमुख आणि विश्वस्त पुनीत बालन, जान्हवी धारीवाल-बालन या दांपत्याच्या हस्ते रंगारी भवनात श्रीमंत भाऊसाहेब रंगारी गणपती बाप्पाची विधिवत पूजा आणि आरती झाली. त्यानंतर आढाव बंधूचे नगारा वादन झाले आणि आकर्षक फुलांनी आणि केळीच्या पानांच्या खुंटांनी सजवलेल्या पारंपरिक रथात बाप्पाच्या मिरवणुकीला सुरुवात झाली.

रंगारी भवनपासून मुख्य मिरवणुकीला सुरुवात झाली. श्री छत्रपती शिवाजी महाराज रस्त्याने पुढे बुधवार चौक, अप्पा बळवंत चौक आणि बाजीराव रस्त्यावरून ही मिरवणूक निघाली. मिरवणुकीत श्रीराम पथक, नादब्रह्म, ज्ञानप्रबोधिनी, आवर्तन, वाद्यवृंद, समर्थ, शिवाय शंखनाद पथके सहभागी झाली होती.

मिरवणूक बुधवार चौकात पोहोचताच तिथे कसबा, पुणे दहीहंडी संघाच्या गोविंदांनी मानवी मनोरे रचून बाप्पाला अत्यंत शिस्तबद्ध आणि भक्तिमय वातावरणात मानवंदना दिली. यानंतर सर्व कार्यकर्त्यांनी आणि भक्तांनी हवेत सप्तरंगांची उधळण केली.

दुपारी साडेबाराच्या सुमारास आगमन मिरवणूक श्री गणेश सुवर्णधाम मंदिरासमोर पोहोचल्यानंतर बाप्पांची मूर्ती अत्यंत देखण्या आणि सुशोभित मखरात विराजमान करण्यात आली. प्रसिद्ध बासरी वादक पद्मविभूषण पंडित हरिप्रसाद चौरसिया यांच्या हस्ते बाप्पाची विधिवत प्रतिष्ठापना करण्यात आली. त्यानंतर श्रीराम जन्मभूमी तीर्थक्षेत्र न्यासाचे सचिव स्वामी गोविंदगिरी महाराज, खासदार सुप्रिया सुळे आदींनी श्री गणेश सुवर्णधाम मंदिरात येऊन श्रीमंत भाऊसाहेब रंगारी गणपती बाप्पाचे दर्शन घेतले.

दरवर्षीप्रमाणे यंदाही श्रीमंत भाऊसाहेब रंगारी गणपतीची बाप्पाची आगमन मिरवणूक अत्यंत उत्साहात पार पडली. ज्येष्ठ बासरीवादक पंडित हरिप्रसाद चौरसिया यांच्या शुभहस्ते गणरायाची प्रतिष्ठापना झाली आहे. बाप्पाच्या आगमनाने आम्हाला अतिशय आनंद झाला असून, पुढील दहा दिवस हा आनंद असाच कायम राहणार आहे. राज्यावरील सर्व विघ्न दूर कर आणि भरपूर पाऊस पडून सर्वत्र आनंदी आनंद व्हावा, सर्वांना सुख, शांती, आरोग्य, धनसंपदा लाभावी, अशी प्रार्थना आम्ही बाप्पाकडे केली.
– पुनीत बालन, उत्सवप्रमुख आणि विश्वस्त, श्रीमंत भाऊसाहेब रंगारी गणपती ट्रस्ट

आज महाराष्ट्रात येऊन हिंदुस्थानातील पहिल्या गणपती बाप्पाची प्राणप्रतिष्ठापना करण्याचे परमभाग्य मला लाभले, त्यामुळे मी स्वतःला खूप भाग्यशाली समजतो. या पवित्र सोहळ्यात सहभागी होता आले, हे माझे पूर्वसंचितच आहे. बाप्पाच्या चरणी मी हीच प्रार्थना करतो, की सर्वांच्या आयुष्यात सुख, समृद्धी, शांती आणि उत्तम आरोग्य लाभो.
– पं. हरिप्रसाद चौरसिया, ज्येष्ठ बासरीवादक