Shri Sevagiri Devsthan – पुण्यश्लोक अहिल्यादेवी होळकर ग्रामीण यात्रास्थळ ‘ब’ वर्ग योजनेअंतर्गत परमपूज्य सद्गुरु श्री सेवागिरी महाराज श्री क्षेत्र पुसेगाव देवस्थान येथे विविध विकास कामांसाठी 5 कोटींच्या निधीस प्रशासकीय मान्यता देण्यात आली आहे. या निधीतून वाहनतळ इमारत उभारली जाणार असून पुढील दोन टप्प्यात आणखी दहा कोटींचा निधी देणार असल्याचे ग्रामविकासमंत्री ना. जयकुमार गोरे यांनी सांगितले.

श्री सेवागिरी महाराज यात्रोत्सवात ना. जयकुमार गोरे यांनी देवस्थान आणि पुसेगावच्या विकासासाठी तीन टप्प्यात 15 कोटींचा निधी जाहीर केला होता. देवस्थान ट्रस्टकडून येथील विकासकामांबाबतचा प्रस्ताव प्राप्त झाल्यानंतर राज्याचे ग्रामविकास व पंचायतराज मंत्री जयकुमार गोरे यांनी त्यावर सकारात्मक निर्णय घेत 5 कोटींच्या निधीस प्रशासकीय मान्यता दिली आहे. सेवागिरी देवस्थानसाठी पुढील दोन टप्प्यात आणखी दहा कोटींचा निधी देण्यात येणार आहे.

या निधीतून यात्रेकरूंना अधिक दर्जेदार सुविधा उपलब्ध होणार असून श्रीक्षेत्र पुसेगावचा सर्वांगीण विकास अधिक गतीने होण्यास चालना मिळणार आहे. सदर प्रस्ताव श्री सेवागिरी देवस्थानचे मठाधिपती सुंदरगिरी महाराज, ट्रस्टचे चेअरमन संतोष वाघ, विश्वस्त डॉ. सुरेश जाधव, रणधीर जाधव, बाळासाहेब उर्फ संतोष जाधव, सचिन देशमुख, गौरव जाधव, सचिव विशाल माने यांनी ग्रामविकास विभागाकडे सादर केला होता.

मंत्री जयकुमार गोरेंचे देवस्थानला नेहमीच सहकार्य
श्री सेवागिरी महाराजांवर श्रद्धा असणार्‍या मंत्री जयकुमार गोरे यांनी देवस्थान ट्रस्टला नेहमीच सहकार्य केले आहे. त्यांच्या माध्यमातून ग्रामविकास विभागाकडून देवस्थानसाठी मंजूर करण्यात आलेल्या निधीतून प्रशस्त वाहतळ उभारले जाणार आहे. पुढील टप्प्यात मिळणार्‍या निधीतून भक्तांच्या सुविधांसाठी आणखी विकासकामे साकारण्यात येणार असल्याचे डॉ. सुरेश जाधव यांनी सांगितले.