मुंबई : नवी मुंबईतील वाशी महापालिका रुग्णालयाच्या शवागृहात मृतदेह गुंडाळण्याच्या कपड्यासाठी 2 हजार रुपये लाच मागितल्याचा धक्कादायक प्रकार समोर आला आहे. हा संतापजनक व्हिडीओ सोशल मीडियावर व्हायरल झाला असून, नागरिकांमध्ये तीव्र संताप व्यक्त होत आहे. एका 23 वर्षीय तरुणीच्या आत्महत्येनंतर तिच्या नातेवाईकांना शवागृहातील कर्मचाऱ्यांनी “कपडे व्यवस्थित गुंडाळून देतो” म्हणत पैशांची मागणी केली.

काय आहे प्रकरण?

मूळची कानपूर येथील असलेली ही तरुणी नवी मुंबईतील ऐरोली परिसरात पेइंग गेस्ट म्हणून राहत होती. ती एका नामांकित आयटी कंपनीत काम करत होती. रविवारी पहाटे तिने राहत्या खोलीत गळफास घेऊन आत्महत्या केली. माहिती मिळताच तिचे आई-वडील उत्तर प्रदेशहून नवी मुंबईत दाखल झाले.

वाशी रुग्णालयाच्या शवागृहात मृतदेह ताब्यात घेण्यासाठी गेले असता, कर्मचाऱ्यांनी प्रथम 1 हजार आणि नंतर 2 हजार रुपये मागितले. हा सारा प्रकार कॅमेऱ्यात कैद झाला असून, व्हिडीओ व्हायरल झाल्याने पालिका प्रशासनावर टीकेची झोड उठली आहे.

नातेवाईकांचा संताप

“मुलीच्या मृत्यूने आम्ही आधीच दुःखात आहोत, त्यात कर्मचाऱ्यांच्या या वागणुकीने आणखी वेदना झाल्या,” अशी भावना मृत तरुणीच्या नातेवाईकांनी व्यक्त केली. त्यांनी दोषी कर्मचाऱ्यांवर कठोर कारवाईची मागणी केली आहे. मात्र, नवी मुंबई महापालिका प्रशासनाकडून याबाबत अद्याप कोणतीही अधिकृत प्रतिक्रिया आलेली नाही.

प्रशासनावर प्रश्नचिन्ह

हा प्रकार उघडकीस आल्यानंतर पालिका प्रशासनातील काही कर्मचारी संवेदनशील परिस्थितीचा गैरफायदा घेत असल्याचे स्पष्ट झाले आहे. सोशल मीडियावर व्हायरल झालेल्या या व्हिडीओमुळे माणुसकीला काळीमा फासणाऱ्या या घटनेची चौकशी आणि दोषींवर कारवाई होण्याची मागणी जोर धरू लागली आहे.